علی گونی نے عمرہ کی ادائیگی کے بعد اپنے مداحوں سے اہم راز شیئر کردیا

پیر 10 مارچ 2025 22:54

مکہ مکرمہ(اُردو پوائنٹ اخبارتازہ ترین - آن لائن۔ 10 مارچ2025ء) بھارتی فلم انڈسٹری کے معروف اداکار علی گونی نے مکہ مکرمہ سے اپنی پوسٹ کے ذریعے اپنے مداحوں کو عمرہ کی ادائیگی کی خوشخبری سنادی۔فوٹو اینڈ ویڈیو شیئرنگ ایپ انسٹاگرام پر شیئر کی گئی ان کی دلکش پوسٹ فورا مداحوں میں مقبول ہوگئی۔علی گونی نے اپنی پوسٹ میں انکشاف کیا کہ عمرہ کی ادائیگی کے بعد سنت کی پیروی کرتے ہوئے، انہوں نے پہلی بار اپنا سر منڈوایا۔

پوسٹ میں علی نے دو تصاویر شیئر کیں۔ پہلی تصویر میں ان کے سر پر بال تھے اور وہ خوش نظر آ رہے تھے، جبکہ دوسری تصویر میں وہ بال منڈوانے کے بعد چہرے پر ماسک لگائے اور وکٹری کا نشان بناتے ہوئے نظر آئے۔علی گونی نے اپنی پوسٹ میں حدیث پاک ﷺ کا حوالہ دیتے ہوئے مداحوں کو بتایا کہ حضرت محمد صلی اللہ علیہ وسلم کے فرمان کے مطابق رمضان میں عمرہ کی ادائیگی حج کے برابر ہے۔

(جاری ہے)

علی نے اس بات کو اسلامی لحاظ سے بہت اہمیت دیتے ہوئے کہا کہ ان کا عمرہ حج کے برابر ہے، اور رمضان میں عمرہ ادا کرنا بہت زیادہ فضیلت رکھتا ہے۔علی گونی کی انسٹاگرام پوسٹ پر سوشل میڈیا صارفین کی جانب سے محبت بھرے ردعمل کا اظہار کیا گیا۔ ان کی ممکنہ گرل فرینڈ اداکارہ جسمین بھاسن نے پوسٹ پر دل والے ایموجیز کے ساتھ محبت کا اظہار کیا۔ جسمین کے ساتھ علی کی بہن الہام گونی اور ان کی سابق ساتھی اداکارہ شیریں مرزا نے بھی علی کی تصویر پر پیار بھرے تبصرے کیے۔

علی گونی کا کیریئر بھارتی رئیلٹی شو MTV Splitsvilla 5 سے شروع ہوا تھا، جس کے بعد انہیں بھارتی ڈراما یہ ہے محبتیں میں رومیش بھلا کے کردار سے شہرت حاصل ہوئی۔ علی گونی نے متعدد مشہور ٹی وی شوز میں بھی کام کیا جن میں کچھ تو ہے تیرے میرے درمیان، یہ کہاں آ گئے ہم، بہو ہماری راجینیکانت، دھائی کلو پریم، دل ہی تو ہے، اور ناگن 3 شامل ہیں۔علی گونی کے بارے میں یہ بھی معلوم ہوا ہے کہ وہ پاکستانی گانوں کے شوقین ہیں اور ان گانوں کے سحر میں مبتلا ہیں، جو ان کے مداحوں کے درمیان ایک اور دل چسپی کا باعث بن رہا ہے۔