چوہدری انوار الحق کا بولان آپریشن مکمل ،مسافروں کو بازیاب کرانے پر سیکیورٹی فورسز کو خراج تحسین

جمعرات 13 مارچ 2025 21:42

مظفرآباد (اُردو پوائنٹ اخبارتازہ ترین - این این آئی۔ 13 مارچ2025ء)آزادجموں و کشمیر کے وزیر اعظم چوہدری انوار الحق نے بولان آپریشن مکمل کرنے اور مسافروں کو بازیاب کرانے پر سیکیورٹی فورسز کو خراج تحسین پیش کیا ہے، وزیراعظم آزاد کشمیر چوہدری انوار الحق نے کہا کہ سیکیورٹی فورسز نے بہترین حکمت عملی سے جعفر ایکسپریس آپریشن کو مکمل کیا، پاک فوج کے بہادر جوانوں نے 33 دہشتگردوں کو کیفرِ کردار تک پہنچایا،سپہ سالار اعلیٰ کی دلیرانہ قیادت کی بدولت بغیر کسی بڑے نقصان کے آپریشن مکمل ہوا، وزیراعظم آزادکشمیر نے کہا کہ مسلح افواج پاکستان اپنی پیشہ ورانہ صلاحیت سے دہشتگردی کی عفریت کو جڑ سے اکھاڑ پھینکیں گی،ریاست پاکستان کے خلاف سازشیں کرنے والے دشمنوں کو منہ کی کھانا پڑے گی، انھوں نے کہا کہ دہشتگردی کے خلاف جنگ میں کھلے اور چھپے دشمنوں کا انجام عبرتناک ہو گا، رمضان المبارک کے مقدس ماہ میں نہتے اور معصوم مسافروں کو نشانہ بنانے والے کسی رعایت کے مستحق نہیں،دھشتگردی کے خلاف جنگ میں کشمیری قوم مسلح افواج پاکستان کے شانہ بشانہ کھڑی ہے، وزیراعظم نے بولان آپریشن میں سیکیورٹی فورسز کے جوانوں اور معصوم مسافروں کی شہادت پر گہرے رنج و الم کا اظہار بھی کیا اور شہداء کے لیے دعائے مغفرت اور ورثاء کے لیے صبر جمیل کی دعا بھی کی۔