سینئر بھارتی اداکاردیب مکھرجی 83برس کی عمر میں چل بسے

دیب مکھرجی نے 1960اور 1970کی دہائی میں کئی فلموں میں معاون کردار ادا کیے، بھارتی میڈیا

ہفتہ 15 مارچ 2025 13:37

سینئر بھارتی اداکاردیب مکھرجی 83برس کی عمر میں چل بسے

ممبئی(اُردو پوائنٹ اخبارتازہ ترین - این این آئی۔ 15 مارچ2025ء)سینئر بھارتی اداکار اور فلمساز ایان مکھرجی کے والد دیب مکھرجی 83برس کی عمر میں انتقال کر گئے۔بھارتی میڈیا کے مطابق اداکار اور فلمساز دیب مکھرجی طویل علالت کے بعد ممبئی میں واقع اپنے گھر میں اس دنیا سے رخصت ہوئے۔خاندان کی جانب سے جاری کردہ بیان میں کہا گیاکہ ہمیں یہ اطلاع دیتے ہوئے بے حد افسوس ہو رہا ہے کہ دیب مکھرجی ہمیں چھوڑ کر چلے گئے ہیں۔

بھارتی میڈیا کے مطابق دیب مکھرجی کی آخری رسومات ممبئی کے علاقے جوہو میں ادا کی گئیں۔دیب مکھرجی نے 1960اور 1970کی دہائی میں کئی فلموں میں معاون کردار ادا کیے، جن میں تو ہی میری زندگی، دو آنکھیں، باتوں باتوں میں، جو جیتا وہی سکندر، کنگ انکل شامل ہیں۔ اس کے علاوہ انہوں نے 1983میں ’’کراٹے‘‘نامی فلم کی ہدایتکاری کی، جس میں متھن چکرورتی، کاجل کرن اور یوگیتا بالی نے مرکزی کردار ادا کیے تھے۔

(جاری ہے)

بھارتی میڈیا کے مطابق دیب مکھرجی کا تعلق مشہور مکھرجی خاندان سے تھا۔ وہ فلم ساز آشوتوش گواریکر کے سسر اور معروف بالی وڈ اداکارائیں کاجول اور رانی مکھرجی کے چچا تھے۔دیب مکھرجی کی والدہ ستی دیوی مشہور اداکار اشوک کمار، انوپ کمار اور کشور کمار کی واحد بہن تھیں۔دیب کے بھائی فلمساز شومو مکھرجی نے بالی وڈ اداکارہ تنوجا سے شادی کی جو کہ کاجول کی والدہ ہیں۔خاندانی افراد اور قریبی دوستوں، بشمول کاجول، رانی مکھرجی، جیا بچن، عالیہ بھٹ، رنبیر کپور، ہریتھک روشن اور دیگر نے دیب مکھرجی کی آخری رسومات میں شرکت کر کے انہیں خراج عقیدت پیش کیا۔