گھوٹکی، رکن سندھ اسمبلی جام مہتاب حسین کی گاڑی پر فائرنگ، 2 محافظ جاں بحق، تین افراد زخمی

پوری دنیا کو پتا ہے اور صحافیوں سے بھی کچھ چھپا ہوا نہیں ہے ، گھوٹکی پولیس کو بھی معلوم ہے یہ دہشت گردی شہریار خان شر کروا رہا ہے، جام مہتاب

اتوار 16 مارچ 2025 19:10

گھوٹکی (اُردو پوائنٹ اخبارتازہ ترین - این این آئی۔ 16 مارچ2025ء)سندھ کے ضلع گھوٹکی کی تحصیل ڈہرکی کے قریب رکن سندھ اسمبلی جام مہتاب ڈہر کے قافلے پر نامعلوم افراد کی فائرنگ سے ان کے 2 محافظ جاں بحق اور 3 زخمی ہوگئے۔تفصیلات کے مطابق گھوٹکی کی تحصیل ڈہرکی کے قریب رکن سندھ صوبائی اسمبلی جام مہتاب حسین ڈہر کی گاڑی پر نامعلوم افراد کی جانب سے حملہ کیا گیا۔

نرلی پل کے مقام پر نامعلوم افراد نے رکن صوبائی اسمبلی کی گاڑی پر فائرنگ کی جس کے نتیجے میں ان کے 2 محافظ جاں بحق اور 3 زخمی ہوگئے جب کہ فائرنگ سے جام مہتاب حسین ڈہر محفوظ رہے۔حملے میں زخمی ہونے والے محافظوں کو ڈہرکی ہسپتال منتقل کردیا گیا جن میں سے 2 کی حالت انتہائی تشیوشناک بتائی جارہی ہے، پولیس نے علاقے کو گھیرے میں لیکر ملزمان کی تلاش شروع کردی۔

(جاری ہے)

بعد ازاں رکن سندھ اسمبلی جام مہتاب ڈھر نے پریس کانفرنس کے دوران کہا کہ پوری دنیا کو پتا ہے اور صحافیوں سے بھی کچھ چھپا ہوا نہیں ہے جب کہ گھوٹکی پولیس کو بھی معلوم ہے یہ دہشت گردی شہریار خان شر کروا رہا ہے۔انہوںنے کہاکہ ان کو یہ پتا نہیں سندھ کے بہادر بیٹے سے پالا پڑا ہے، یہاں پر سب شریف قومیں ہیں جو میرے ہمدرد ہیں اور دوست بھی ہیں، ہم اس حملے کا جواب کسی عام آدمی کو نہیں دیں گے سیدھا شہریار شر کو دیں گے۔

جام مہتاب نے کہا کہ صبح کے وقت میں اپنے زرعی زمین پر جارہا تھا تو اس وقت شہریار شر نے مجھے دیکھا تھا واپس آکر ساری منصوبہ بندی کی ہے، میرا ایک ہمدرد بھی ان کے ساتھ تھا جس نے مجھے بتایا کہ یہ سازش کررہا ہے۔انہوں نے کہا کہ میں گھر جارہا تھا تو راستے میں 100 کے قریب افراد نے حملہ کیا ہے، ، بزدل نہیں ہوں کہ گھر چلا جاتا، ابھی بھی میں یہاں موجود ہوں دیکھتے ہیں پولیس کیا ایکشن لیتی ہے۔