ایس آئی ایف سی کی معاونت سے گوادر فری زون کی ترقی میں اہم پیشرفت

سرمایہ کاروں کی شمولیت سے برآمدات 80 ملین ڈالرتک بڑھنے کا امکان

جمعرات 20 مارچ 2025 17:48

لاہور(اُردو پوائنٹ اخبارتازہ ترین - این این آئی۔ 20 مارچ2025ء)ایس آئی ایف سی کی معاونت سے گوادر فری زون کی ترقی میں اہم پیشرفت ہوئی ہے ،ای سی سی کی جانب سے گوادر فری زون میں کام کرنے والی کمپنی ایگ وین پرائیویٹ لمیٹڈ کو پوٹاشیم سلفیٹ کھاد کی برآمد کی منظوری دیدی گئی۔فیصلے سے برآمدات کا آغاز اور سرمایہ کاروں کی گوادر فری زون میں دلچسپی میں اضافہ متوقع ہے، چمڑے اور معدنیات کی پراسیسنگ سمیت دیگر صنعتوں کی جانب سے بھی گوادر فری زون میں سرمایہ کاری کے امکانات روشن ہوگئے۔

ایس آئی ایف سی کی سہولت کاری کے تحت ای ای سی سی نے ایگ وین پرائیویٹ لمیٹڈ کو سالانہ دس ہزار ٹن یا اپنی پیداوار کا 50 فیصد پوٹاشیم سلفیٹ کھاد برآمد کرنے کی اجازت دے دی ہے۔ یہ فیصلہ نہ صرف برآمدات کے نئے راستے کھولے گا بلکہ گوادر فری زون میں مقامی اور بین الاقوامی سرمایہ کاروں کی دلچسپی میں اضافہ کرے گا۔

(جاری ہے)

2025 تک پوٹاشیم سلفیٹ کھاد کی برآمدات سے 7 ملین ڈالر کی سالانہ آمدنی حاصل کرنے کا ہدف رکھا گیا ہے۔

یہ اقدام ملکی معیشت کے استحکام کے لیے انقلابی ثابت ہو سکتا ہے۔ اگر کمپنی کو مزید برآمدی سہولیات فراہم کی گئیں تو اس کے پلانٹ کی توسیع کے ساتھ ساتھ اگلے 2 سے 3 سال میں برآمدات 80 ملین ڈالر تک پہنچنے کا امکان ہے۔حکومت کی جانب سے گوادر فری زون کی ترقی کے لیے خصوصی اقدامات کیے جا رہے ہیں۔ شپمنٹ کی حد اور ڈیٹا نگرانی کے ذریعے موثر ضابطہ کاری کو یقینی بنایا جا رہا ہے۔

ایس آئی ایف سی کی کوششوں کے باعث گوادر فری زون کو ایکسپورٹ پالیسی آرڈر سے استثنی حاصل ہو گیا ہے، جس سے برآمدات پر مبنی کاروبار کو فروغ دینے میں مدد ملے گی۔اس کے علاوہ صرف کھاد ہی نہیں، بلکہ چمڑے اور معدنیات کی پراسیسنگ سمیت دیگر صنعتوں کے لیے بھی گوادر فری زون میں سرمایہ کاری کے روشن امکانات ہیں۔ ایس آئی ایف سی کی کاوشوں کے باعث گوادر پورٹ سے تجارتی سرگرمیوں میں تیزی آئی ہے، جس سے اقتصادی ترقی کی راہیں ہموار ہو رہی ہیں۔