خیبر پختونخوا میں اسکولوں کی حالتِ زار پر سیکریٹری تعلیم طلب

جمعہ 21 مارچ 2025 16:28

اسلام آباد (اُردو پوائنٹ اخبارتازہ ترین - این این آئی۔ 21 مارچ2025ء)سپریم کورٹ نے خیبر پختون خوا میں اسکولوں کی حالتِ زار پر ازخود نوٹس کی سماعت کے دوران سیکریٹری تعلیم کے پی کو طلب کر لیا۔سپریم کورٹ میں خیبر پختون خوا کے اسکولوں کی حالتِ زار کے حوالے سے از خود نوٹس کی سماعت کے دوران جسٹس جمال خان مندو خیل نے سیکریٹری تعلیم کے پی کی عدم موجودگی پر اظہارِ برہمی کرتے ہوئے انہیں دوپہر 12 بجے طلب کر لیا۔

(جاری ہے)

جسٹس جمال خان مندوخیل نے ریمارکس دیتے ہوئے کہا کہ سیکریٹری نہیں ہیں، آپ لوگوں نے مذاق بنایا ہوا ہے۔انہوں نے کہا کہ ہماری عدالت کا گزشتہ آرڈر پڑھیں وہ کیا ہے، آپ لوگ اس عدالت کے احکامات کو اہمیت ہی نہیں دے رہے، ایک سیکریٹری اس عدالت کی بات نہیں سن رہا، مذاق بنایا ہوا ہے۔جسٹس جمال مندوخیل نے کہا کہ پشاور سے سیکریٹری صاحب 2 گھنٹے میں آ سکتے ہیں، انہیں بلائیں، ہمیں ان کو بلانے کا طریقہ آتا ہے۔