وزیرتعلیم رانا سکندرحیات کا یونیورسٹی آف مینجمنٹ اینڈ ٹیکنالوجی کا دورہ ، شجرکاری مہم کے تحت پودا لگایا

جمعہ 21 مارچ 2025 22:37

لاہور (اُردو پوائنٹ اخبارتازہ ترین - آن لائن۔ 21 مارچ2025ء)وزیر تعلیم رانا سکندر حیات نے یونیورسٹی آف مینجمنٹ اینڈ ٹیکنالوجی (یو ایم ٹی) کا دورہ کیا اور شجرکاری مہم کے تحت پودا لگایا۔ اس موقع پر ریکٹر یوایم ٹی ڈاکٹر آصف رضا، ڈی جی یو ایم ٹی احمد عبداللہ سمیت سٹاف اور طلباء کی کثیر تعداد نے شرکت کی۔ منعقدہ تقریب میں میڈیا سے گفتگو کرتے ہوئے انہوں نے کہا کہ سموگ کے مقابلے کیلئے وسیع پیمانے پر شجرکاری اہمیت اختیار کر چکی ہے۔

سموگ کے تدارک کیلئے ابھی سے موثر تیاری کرنے کی ضرورت ہے۔ پنجاب کی یونیورسٹیوں اور کالجوں میں مجموعی طور پر 5 لاکھ پودے لگائے گئے ہیں جبکہ تمام سکولوں میں بھی بڑی تعداد میں شجرکاری کی گئی ہے۔وزیر تعلیم نے کہا کہ محکمہ کو لگائے گئے پودوں کی میپنگ کرنے کی ہدایات کی ہیں۔

(جاری ہے)

یو ایم ٹی میں آج 5 ہزار اور اگلے 3 دنوں میں مجموعی طور پر 25 ہزار کی شجرکاری ہوگی جو کہ صدر یو ایم ٹی ابراہیم مراد کے متحرک وڑن کی عکاسی کرتی ہے۔

یو ایم ٹی کی "ایک طالبعلم ایک پودا" مہم ماحولیاتی تحفظ کیلئے موثر قدم ہے۔ زیادہ شجرکاری سے پاکستان کو کاربن کریڈٹ والا ملک بنائیں گے۔ صوبے میں الیکٹرک بسوں، ای بائیکس اور سکوٹیز کے ذریعے سموگ کے تدارک پر کام کر رہے ہیں۔ وہ وقت دور نہیں جب سنجیدہ اقدامات کی بدولت پاکستان کاربن کریڈٹ والے ممالک میں شمار ہوگا۔ وزیر تعلیم نے یو ایم ٹی کا شمار سرسبز ترین یونیورسٹیوں میں ہونا حوصلہ افزاء قرار دیتے ہوئے کہا کہ شجرکاری کے حوالے سے ہر فرد کو ذمہ داری کا احساس کرنا ہوگا۔