برطانیہ پاکستان کے ساتھ تجارت، موسمیاتی تبدیلی اور تعلیم سمیت مختلف شعبوں میں دوطرفہ تعلقات کو مضبوط بنانے کے لئے پرعزم ہے، پاکستان میں برطانوی ہائی کمشنر جین میریٹ

اتوار 23 مارچ 2025 00:40

اسلام آباد (اُردو پوائنٹ اخبارتازہ ترین - اے پی پی۔ 23 مارچ2025ء) پاکستان میں برطانوی ہائی کمشنر جین میریٹ نے کہا ہے کہ برطانیہ پاکستان کے ساتھ تجارت، موسمیاتی تبدیلی اور تعلیم سمیت مختلف شعبوں میں دوطرفہ تعلقات کو مضبوط بنانے کے لئے پرعزم ہے۔ہفتہ کو پی ٹی وی سے گفتگو کرتے ہوئے انہوں نے پاکستان کی اقتصادی ترقی اور ماحولیاتی استحکام کے لیے برطانیہ کی جاری حمایت پر زور دیتے ہوئے دونوں ممالک کے درمیان پائیدار شراکت پر روشنی ڈالی۔

(جاری ہے)

انہوں نے کہا کہ برطانیہ پاکستان کے ساتھ مضبوط تجارتی تعلقات کو فروغ دینے، سرمایہ کاری کی حوصلہ افزائی اور پائیدار اقتصادی ترقی کی حمایت کے لیے وقف ہے۔انہوں نے موسمیاتی اقدامات پر تعاون کی اہمیت پر زور دیتے ہوئے مزید کہا کہ پاکستان ان ممالک میں شامل ہے جو موسمیاتی تبدیلیوں کا سب سے زیادہ شکار ہیں۔ برطانوی ہائی کمشنر نے تعلیمی تبادلوں کی اہمیت پر بھی زور دیا اور کہا کہ برطانیہ اسکالرشپ کے مواقع کو بڑھانے اور تعلیمی تعاون کو بڑھانے کے لیے پرعزم ہے۔انہوں نے سفارتی تعلقات کو مزید گہرا کرنے اور علاقائی اور عالمی چیلنجوں سے نمٹنے کے لیے پاکستان کے ساتھ مل کر کام کرنے کے لیے برطانیہ کے عزم کا اعادہ کیا۔