قراردادِ پاکستان ہمارے اتحاد، یکجہتی اور قربانیوں کی علامت ہے ، پروفیسر ڈاکٹر شازیہ بشیر

اتوار 23 مارچ 2025 15:30

سیالکوٹ (اُردو پوائنٹ اخبارتازہ ترین - اے پی پی۔ 23 مارچ2025ء) وائس چانسلر گورنمنٹ کالج ویمن یونیورسٹی سیالکوٹ پروفیسر ڈاکٹر شازیہ بشیر نے کہا ہے کہ قراردادِ پاکستان نہ صرف ہمارے اتحاد، یکجہتی اور قربانیوں کی علامت ہے بلکہ یہ ہمیں یہ درس بھی دیتی ہے کہ اپنے مقاصد کے حصول کے لیے مسلسل محنت اور عزم ضروری ہے۔

(جاری ہے)

اتوار کو یہاں 23 مارچ کے حوالہ سے جاری کردہ اپنے ایک بیان میں انہوں نے کہا کہ 23 مارچ 1940 کا دن ہماری قومی تاریخ میں ایک سنگِ میل کی حیثیت رکھتا ہے جب برصغیر کے مسلمانوں نے اپنے علیحدہ وطن کے قیام کا عہد کیا۔

انہوں نے کہا کہ گورنمنٹ کالج ویمن یونیورسٹی سیالکوٹ علم و شعور کی روشنی کو عام کرنے میں اپنا بھرپور کردار ادا کر رہی ہے تاکہ ہماری بیٹیاں ایک مضبوط، ترقی یافتہ اور خودمختار پاکستان کی معمار بن سکیں۔ انہوں نے کہا کہ ہمیں چاہیے کہ ہم اس دن کی اصل روح کو سمجھیں اور ملک کی ترقی، خوشحالی اور استحکام کے لیے اپنا کردار ادا کریں۔ انہوں نے کہا کہ آئیے! ہم سب عہد کریں کہ پاکستان کو اقوامِ عالم میں ایک مثالی ریاست بنانے کے لیے اپنی تمام تر توانائیاں بروئے کار لائیں گے۔ پاکستان زندہ باد!