دانش یونیورسٹی کے لیگل فریم ورک کے حوالے سے اہم اجلاس کا انعقاد

منگل 25 مارچ 2025 17:38

اسلام آباد (اُردو پوائنٹ اخبارتازہ ترین - اے پی پی۔ 25 مارچ2025ء) وزیراعظم شہباز شریف کی ہدایت پر منگل کو وزیر قانون اعظم نذیر تارڑ کی زیر صدارت دانش یونیورسٹی کے قانونی فریم ورک کے حوالے سے ایک اہم اجلاس منعقد ہوا۔ترجمان وزارت قانون وانصاف کے مطابق اجلاس میں چیئرمین ہائر ایجوکیشن کمیشن (ایچ ای سی ) سمیت دیگر اعلیٰ حکام نے شرکت کی۔وزیر قانون نے اجلاس کے دوران واضح کیا کہ دانش یونیورسٹی ایک خود مختار ادارہ ہوگا جس کا انتظام غیر حکومتی طرز پر چلایا جائے گا۔

انہوں نے اس بات پر زور دیا کہ یونیورسٹی کے قانونی ڈھانچے کو جدید خطوط پر استوار کیا جائے گا تاکہ یہ دنیا کی بہترین جامعات کے معیار کے مطابق ہو۔ اجلاس میں یونیورسٹی کے انڈوومنٹ فنڈ کے قیام پر بھی گفتگو ہوئی جس کا مقصد مالی مشکلات کے شکار ہونہار طلبہ کو معیاری اور عالمی سطح کی تعلیم فراہم کرنا ہے۔

(جاری ہے)

وزیر قانون نے کہا کہ اس تعلیمی ادارے کے قیام کے لئے دنیا بھر کے کامیاب تعلیمی ماڈلز کا جائزہ لیا جا رہا ہے تاکہ اسے ایک بین الاقوامی معیار کی درسگاہ بنایا جا سکے۔

اجلاس کے دوران شرکاء نے اس بات پر اتفاق کیا کہ دانش یونیورسٹی تحقیق، ترقی، اور اپلائیڈ سائنسز پر مرکوز ہو گی، اس ضمن میں ایک جامع قانونی فریم ورک تشکیل دیا جا رہا ہے، جو مستقبل کے طلبہ کے لئے ایک مثالی تعلیمی ماحول فراہم کرے گا۔وزیر قانون نے کہا کہ تمام قانونی اور انتظامی پہلوؤں کو مدنظر رکھتے ہوئے فریم ورک کو جلد از جلد حتمی شکل دی جائے گی تاکہ اس منصوبے کو عملی جامہ پہنایا جا سکے۔