پیکا کے مقدمے میں صحافی فرحان ملک عدالتی ریمانڈ پر جیل منتقل

کسی کو تنگ کیا تو آپ کو شوکاز نوٹس جاری کریں گے،عدالت کی تفتیشی افسرکو تنبیہ د،درخواست ضمانت پر نوٹسز بھی جاری

منگل 25 مارچ 2025 17:52

پیکا کے مقدمے میں صحافی فرحان ملک عدالتی ریمانڈ پر جیل منتقل

کراچی (اُردو پوائنٹ اخبارتازہ ترین - این این آئی۔ 25 مارچ2025ء)کراچی کی مقامی عدالت نے سینئر صحافی فرحان ملک کو عدالتی ریمانڈ پر جیل بھیج دیا، عدالت نے فرحان ملک کی درخواست ضمانت پر نوٹسز بھی جاری کر دیے۔کراچی سٹی کورٹ کی جوڈیشل مجسٹریٹ شرقی کی عدالت میں صحافی فرحان ملک کو ایف آئی اے نے پیش کیا، فرحان ملک کے وکیل نے عدالت کو بتایا کہ فرحان ملک صحافی ہیں، کیس سے ڈسچارج کرنے کی درخواست کی تھی۔

تفتیش افسر نے عدالت کو آگاہ کیا کہ ڈیجیٹل یوٹیوب چینل ہے اس پر اینٹی اسٹیٹ ویڈیوز پوسٹ ہوئی ہیں، عدالت نے تفتیشی افسرسے استفسار کیا کہ ایسی کیا ویڈیوز ہیں، ویڈیوز دکھائی جائیں، کیس میں مدعی کون ہی فرحان ملک کے وکیل نے عدالت کو بتایا کہ انکا دفتری شخص اس کیس میں مدعی ہیں، سارا میٹریل آن لائن موجود ہے۔

(جاری ہے)

عدالت نے فرحان ملک سے سوال کیا کہ آپ پر تشدد یا حراساں تو نہیں کیا جا رہا ہی جس پر فرحان ملک نے کہا کہ ہمارے اسٹاف کو تنگ کیا جارہا ہے۔

عدالت نے تفتیشی افسر کو تنبیہ کی اور کہا کہ کسی کو تنگ کیا تو آپ کو شوکاز نوٹس جاری کریں گے، عدالت نے فرحان ملک کو عدالتی ریمانڈ پر جیل بھیجتے ہوئے درخواست ضمانت پر نوٹس جاری کر دیے۔واضح رہے کہ گذشتہ دنوں سینئر صحافی اور یوٹیوب چینل رفتار کے بانی فرحان ملک کو ایف آئی اے نے کراچی میں گرفتار کیا۔ رفتار کے ایڈیٹر فہد کیہر اور فرحان ملک کے بعض قانونی معاملات دیکھنے والے عبدالمعیز جعفری نے گرفتاری کی تصدیق کی۔