چیئرمین سی ڈی اے چوہدری محمد علی رندھاوا کا آئی سی سی آئی کا دورہ، شجر کاری مہم کا افتتاح، بزنس کمیونٹی کے مسائل کے حل کی یقین دہانی

اسلام آباد (اُردو پوائنٹ اخبارتازہ ترین - اے پی پی۔ 26 مارچ2025ء) چیئرمین کیپٹل ڈویلپمنٹ اتھارٹی (سی ڈی اے) اور چیف کمشنر اسلام آباد چوہدری محمد علی رندھاوا نے اسلام آباد کی کاروباری برادری کو معاشی ترقی، روزگار کے مواقع پیدا کرنے اور شہر کے تجارتی منظر نامہ کو مضبوط بنانے میں اہم کردار ادا کرنے پر سراہا ہے ۔بدھ کو اسلام آباد چیمبر آف کامرس اینڈ انڈسٹری (آئی سی سی آئی) کے دورے کے دوران تاجر رہنماؤں سے خطاب کرتے ہوئے انہوں نے یقین دلایا کہ سی ڈی اے تاجروں اور صنعتکاروں کو درپیش مسائل کے حل کے لئے پرعزم ہے۔

انہوں نے اعلان کیا کہ آئی سی سی آئی اور ایف پی سی سی آئی کے فوکل پرسنز کو سی ڈی اے بورڈ میٹنگز میں مدعو کیا جائے گا تاکہ وہ اپنے مسائل کو اجاگر کریں اور ان کے حل کے لئے تحقیق پر مبنی حل پیش کریں۔

(جاری ہے)

چیئرمین سی ڈی اے نے شہر میں جاری پانی کے بحران سے نمٹنے کے لئے اتھارٹی کی جانب سے اٹھائے گئے اقدامات کا بھی خاکہ پیش کیا۔ انہوں نے سی ڈی اے کے تعاون سے بڑے پیمانے پر درخت لگانے کی مہم شروع کرنے پر آئی سی سی آئی کا شکریہ ادا کیا، نئے لگائے گئے پودوں کے تحفظ اور دیکھ بھال کو یقینی بنانے کیلئے بھی بات چیت کی گئی ۔

آئی سی سی آئی کے صدر ناصر منصور قریشی نے اپنے خطاب میں تاجر برادری کو درپیش اہم چیلنجز پر روشنی ڈالی۔ انہوں نے مارکیٹوں میں صفائی کے نظام، ٹیکسوں میں اضافے، ٹریڈ چینج چارجز اور دیگر مسائل کی نشاندہی کی۔انہوں نے تاجروں جرمانے، پارکنگ فیس، فروٹ اور سبزی منڈی میں صفائی کے ناقص انتظامات اور صنعتی ایریا کے بگڑتے انفراسٹرکچر کے بارے میں بھی تشویش کا اظہار کیا جس سے کاروباری سرگرمیاں بری طرح متاثر ہو رہی ہیں۔

انہوں نے سیکٹر H-13 میں ایک وقف قبرستان کی فوری ضرورت پر بھی زور دیا۔ انہوں نے اعلان کیا کہ آئی سی سی آئی نے کاروباری برادری کے تعاون سے اسلام آباد کی ہریالی کو بڑھانے اور اس کی خوبصورتی کو برقرار رکھنے کے لیے ایک لاکھ پودے لگانے کا منصوبہ بنایا ہے۔سینئر نائب صدر عبدالرحمن صدیقی نے تقریب کا اغاز کرتے ہوئے، حکومت اور تاجر برادری کے درمیان ایک مضبوط پل کے طور پر آئی سی سی آئی کے کردار کی توثیق کی، اور کاروبار دوست پالیسیوں کو فروغ دینے کے لئے چیمبر کے غیر متزلزل عزم کو اجاگر کیا ۔

تقریب میں ڈی جی انوائرنمنٹ، ڈی جی بلڈنگ اینڈ ہاؤسنگ کنٹرول سمیت اہم شخصیات ،آئی سی سی آئی کے سابق صدور میاں شوکت مسعود، اعجاز عباسی، باسر داؤد، خالد اقبال ملک کے علاوہ ایگزیکٹو ممبران سردار طاہر محمود، عرفان چوہدری، ملک عبدالعزیز، اسحاق سیال، عمران عباس، ذوالقرنین عباسی، عبدالعزیز نعیم اختر اعوان، عامر قریشی، ثناء اللہ خان، فاطمہ عظیم اور آئی سی سی آئی کے صدر کے مشیر نعیم صدیقی نے شرکت کی۔

اس موقع پر ڈاکٹر راشد آفتاب نے پانی کے تحفظ کی اہمیت اور جڑواں شہروں میں پانی کے بڑھتے ہوئے بحران کے بارے میں ایک جامع پریزنٹیشن دی۔قبل ازیں آمد پر معزز مہمان نے آئی سی سی آئی کے صدر کے ہمراہ چیمبر کے لان میں ایک پودا لگا کر سی ڈی اے کے تعاون سے آئی سی سی آئی کی شجرکاری مہم کا افتتاح کیا جو کہ ایک سرسبز اسلام آباد کے مشترکہ عزم کی علامت ہے۔