رمضان احساس کا مہینہ ہے، اس وقت سب سے زیادہ احساس کے مستحق فلسطینی عوام ہیں، پیر سید حیدر علی گیلانی

جمعرات 27 مارچ 2025 19:23

اسلام آباد (اُردو پوائنٹ اخبارتازہ ترین - اے پی پی۔ 27 مارچ2025ء) سجادہ نشین بری امام سرکار و جانشین دربارعالیہ رتے ہوتر شریف پیر سید حیدر علی گیلانی نے کہا ہےکہ رمضان احساس کا مہینہ ہے اوراس وقت سب سے زیادہ احساس کے مستحق فلسطینی عوام ہیں، بیت المقدس کی آزادی کیلئے ہمیں اپنے اندر بدر، خندق اور خیبرجیسے جذبہ ایمانی کی ضرورت ہے۔ ان خیالات کا اظہار انہوں نے جمعرات کو یہاں نیشنل پریس کلب اسلام آباد میں القدس کمیٹی پاکستان اور این پی سی کے اشتراک سے فلسطین(اہل غزہ )کے مظلوم عوام کے ساتھ اظہار یکجہتی اور قبلہ اول کی آزادی کیلئے" غزہ اور اقوام عالم کا کردار" کے عنوان سے منعقدہ سیمینار سے خطاب کرتے ہوئےکیا۔

سیمینار سےپی ایف یو جے کے صدر افضل بٹ، سابق وفاقی وزیرڈاکٹر ندیم جان، تنظیم نوجوانان پاکستان کے سربراہ عبداللہ حمید گل،پاکستانی نظریاتی پارٹی کے چیئرمین شہیر سیالوی، علامہ سید ضمیر حسین شاہ کاظمی، پیر محمد سعید نقشبندی،پیر حسیب نذیری،اسلام آبادہائیکورٹ بار کے صدرسید علی واجدگیلانی،سید امجد حسین نقوی،و دیگر نے بھی خطاب کیا۔

(جاری ہے)

مقررین کا مزید کہنا تھا کہ غزہ ظلم و بربریت کی چکی میں پس رہا ہے ،فلسطین پر غاصبانہ قبضہ کیا گیاہے، فلسطین فلسطینیوں کا ہے۔آج جو کچھ بھارت کے غیرقانونی زیرقبضہ جموں و کشمیر اور فلسطین میں ہو رہا ہے وہ لمحہ فکریہ ہے، غزہ میں عورتوں اور بچوں پر ہونے والی درندگی کو دیکھ کر درندے بھی شرمندہ ہیں،اسرائیل کو نہتے اور مظلوم فلسطینیوں پر ڈھائے جانیوالے مظالم کا حساب دینا ہوگا۔