کوئٹہ دھماکے کی سی سی ٹی وی فوٹیج منظرعام پر آگئی، ملزم نے ریموٹ کنٹرول سے دھماکا کیا

جمعہ 28 مارچ 2025 17:37

کوئٹہ(اُردو پوائنٹ اخبارتازہ ترین - این این آئی۔ 28 مارچ2025ء)کوئٹہ میں ڈبل روڈ پر دھماکے کی سی سی ٹی وی فوٹیج منظرعام پر آگئی،سی سی ٹی وی فوٹیج میں پولیس موبائل کو گزرتے دیکھا جاسکتا ہے جبکہ کالے کپڑوں میں ملبوس ملزم نے ریموٹ کنٹرول سے دھماکا کیا۔میڈیارپورٹ کے مطابق کوئٹہ میں بڑیچ مارکیٹ کے قریب دھماکے کی سی سی ٹی وی فوٹیج منظرعام پر آگئی ہے۔

ویڈیو میں دیکھا جا سکتا ہے کہ دھماکے سے قبل موٹر سائیکل سوار ملزم موجود ہے، ملزم نے شناخت چھپانے کیلئے چہرے پر نقاب اور کیپ پہن رکھی تھی۔سی سی ٹی وی فوٹیج کے مطابق چہرے پر سفید رومال باندھا ہوا ملزم مرکزی سڑک پر موٹر سائیکل کھڑی کرکے اس پر بیٹھا ہوا نظر آرہا ہے، مشکوک شخص کبھی سڑک پر کھڑا ہوجاتا ہے اور کبھی موٹر سائیکل پر بیٹھ جاتا ہے۔

(جاری ہے)

ڈبل روڈ پر واقع بڑیچ مارکیٹ کے قریب دھماکے سے قبل فوٹیج دیکھا جا سکتا ہے کہ جائے وقوعہ پر موٹر سائیکل سوارچہرہ ملزم بے چینی سے اطراف پر نظر رکھے ہوئے ہے، اور جیسے ہی سیکیورٹی فورسز کی گاڑی گزرتی ہے، ملزم ریموٹ سے دھماکا کر دیتا ہے۔دریں اثناء کوئٹہ میں ڈبل روڈ پر دھماکے کا مقدمہ سی ٹی ڈی تھانے میں درج کر لیا گیا۔ مقدمہ نامعلوم ملزمان کے خلاف متعلقہ ڈیوٹی آفیسر کی مدعیت میں درج کیا گیا ہے۔پولیس ذرائع کے مطابق کوئٹہ کے ڈبل روڈ پر دھماکے کا مقدمہ سی ٹی ڈی تھانے میں درج کر لیا گیا۔ مقدمہ متعلقہ ڈیوٹی آفیسرکی مدعیت میں درج کیا گیا۔ مقدمے میں قتل، اقدام قتل و دیگر دفعات شامل کی گئی ہیں۔