Live Updates

آئی ایم ایف کا ایک اور وفد جلد پاکستان کا دورہ کریگا، نئے مالی سال کے بجٹ پر مشاورت ہوگی

معاہدے پر عمل درآمد نہ ہوا تو موسمیاتی تبدیلیوں سے نمٹنے کے لیے قرض کی فراہمی ممکن نہیں ہوگی، ذرائع

جمعہ 28 مارچ 2025 20:55

آئی ایم ایف کا ایک اور وفد جلد پاکستان کا دورہ کریگا، نئے مالی سال ..

اسلام آباد(اُردو پوائنٹ اخبارتازہ ترین - این این آئی۔ 28 مارچ2025ء)پاکستان میں نئے مالی سال2025-26کے بجٹ کی تیاری کے حوالے سے آئی ایم ایف کا ایک اور وفد جلد ملک کا دورہ کرے گا۔ ذرائع کے مطابق اس دورے میں بجٹ سے متعلق اہم امور پر فیس ٹو فیس اور آن لائن مشاورت کی جائے گی۔ذرائع کے مطابق آئی ایم ایف کے ساتھ مشاورت کے بعد بجٹ کو حتمی شکل دے کر پارلیمنٹ میں پیش کیا جائے گا۔

نئے مالی سال کا بجٹ جون کے پہلے ہفتے میں پیش کیے جانے کا امکان ہے۔آئی ایم ایف کی جانب سے پراپرٹی سیکٹر میں کچھ حد تک ریلیف دینے پر آمادگی ظاہر کی گئی ہے۔ذرائع کے مطابق جائیداد کی پہلی خرید و فروخت پر فیڈرل ایکسائز ڈیوٹی ختم کر دی جائے گی، تاہم ودہولڈنگ اور انکم ٹیکس کی موجودہ شرح برقرار رہے گی۔

(جاری ہے)

پراپرٹی فروخت کرنے والوں پر بھی موجودہ ٹیکس کی شرح میں کوئی تبدیلی نہیں کی جائے گی۔

ذرائع نے بتایاہے کہ آئی ایم ایف معاہدے کے تحت سفارشات کی حتمی منظوری ایگزیکٹو بورڈ مئی کے آخر یا جون میں دے گا، اس وقت تک بجٹ کی تیاری مکمل ہو چکی ہوگی۔ معاہدے پر عمل درآمد نہ ہونے کی صورت میں پاکستان کو موسمیاتی تبدیلیوں سے نمٹنے کیلئے قرض کی فراہمی ممکن نہیں ہوگی۔ذرائع نے بتایا کہ آئی ایم ایف ایگزیکٹو بورڈ کا اجلاس بجٹ کی تفصیلات طے ہونے کے بعد طلب کیا جائے گا، تاہم اپریل میں ہونے والے ایگزیکٹو بورڈ کے اجلاس میں پاکستان کے پروگرام پر کوئی غور نہیں کیا جائے گا۔