دوسرا ون ڈے: نیوزی لینڈ نے پاکستان کو 84 رنز سے ہرا کر سیریز اپنے نام کرلی

پاکستان کیلئے فہیم اشرف نے سب سے زیادہ 73 رنز کی اننگز کھیلی، نسیم شاہ کی بھی نصف سنچری

ذیشان مہتاب بدھ 2 اپریل 2025 11:00

ہیملٹن (اردو پوائنٹ تازہ ترین اخبار ۔ 2 اپریل 2025ء ) دوسرے ایک روزہ میچ میں نیوزی لینڈ نے پاکستان کو 84 رنز سے شکست دیکر سیریز اپنے نام کرلی ۔ ہیملٹن میں کھیلے جارہے میچ میں میزبان نیوزی لینڈ نے دعوت پر پہلے بیٹنگ کرتے ہوئے مقررہ اوورز میں 8 وکٹوں پر 292 رنز بنائے۔

کیوی اوپنرز نے ٹیم کو 54 رنز کا آغاز فراہم کیا جس کے بعد وقفے وقفے سے وکٹیں گرتی رہیں، تاہم ساتویں نمبر پر بیٹنگ کے لیے آنے والے مچل ہے نے ٹیم کے بڑے ہدف کی طرف راہ ہموار کی اور 78 گیندوں پر 99 رنز کی ناقابل شکست اننگز کھیلی۔

ان کے علاوہ پاکستانی نژاد محمد عباس 41 رنز بنا کر دوسرے نمایاں بلے باز رہے۔ دیگر بلے بازوں میں ریس ماریو 18، نِک کیلی 31، ہنری نکولس 22، ڈیرل مچل 18، کپتان مائیکل بریس ویل 17، نیتھن اسمتھ 8 اور بین سیئرز 6 رنز بنا کر آؤٹ ہوئے۔

(جاری ہے)

پاکستان کے محمد وسیم اور سفیان مقیم نے 2، 2 جبکہ فہیم اشرف، عاکف جاوید اور حارث رؤف نے ایک، ایک کھلاڑی کو آؤٹ کیا۔

293 رنز کے ہدف کے تعاقب میں پاکستان نے بدترین آغاز کیا اور محض 32 رنز پر اس کی آدھی ٹیم پویلین لوٹ گئی۔ عبداللہ شفیق اور بابراعظم ایک، ایک، امام الحق 3، کپتان محمد رضوان 5 اور سلمان آغاز 9 رنز بنا کر آؤٹ ہوئے۔

جہاں پاکستان کے سات کھلاڑی ڈبل فگر میں داخل بھی نہ ہوسکے وہیں آل راؤنڈر فہیم اشرف نے 73 رنز بنا کر ٹیم کو سنبھالا دیا لیکن ان کی یہ اننگز ٹیم کے کام نہ آسکی۔

حارث رؤف کے 3 رنز پر باؤنسر لگنے سے کنکشن کا شکار ہونے کے بعد ان کی جگہ بلے بازی کرنے والے نسیم شاہ نے بھی دیدہ دلیری سے بلے بازی کی اور پاکستان کو 200 رنز عبور کرنے کرنے میں اہم کردار ادا کرتے ہوئے 51 رنز کی شاندار باری کھیلی۔

پاکستان کی پوری ٹیم 42ویں اوور میں 208 رنز بنا کر آؤٹ ہوگئی اور کیوی ٹیم نے مسلسل دوسرا میچ جیت لیا۔

بین سیئرز نے شاندار باؤلنگ کا مظاہر کرتے ہوئے 5 شکار کیے جبکہ جیکب ڈفی کے حصے میں 3، وِل اورورکے اور نیتھن اسمتھ کے حصے میں ایک، ایک وکٹ آئی۔

اس میچ میں فتح کے ساتھ نیوزی لینڈ نے تین میچوں کی سیریز میں 0-2 کی فیصلہ کن برتری حاصل کرلی ہے۔