بطور نمبر 11 بیٹر اننگز میں زیادہ چھکے، نسیم شاہ نے بڑا ریکارڈ برابر کردیا

پیسر نے کیویز کیخلاف اپنے کیریئر کی پہلی نصف سنچری بنائی اور 51 رنز کی اننگز کھیلی جس میں 4 چوکے اور 4 چھکے شامل تھے

ذیشان مہتاب جمعرات 3 اپریل 2025 15:53

لاہور (اردو پوائنٹ تازہ ترین اخبار ۔ 3 اپریل 2025ء ) قومی ٹیم کے فاسٹ بائولر نسیم شاہ نے نمبر 11 کے بیٹر کی طرف سے بطور بیٹر اننگز میں زیادہ چھکے لگانے کا ریکارڈ برابر کردیا ہے۔

ہیملٹن میں کھیلے جارہے میچ میں پاکستان کی بیٹنگ کے دوران فاسٹ بولر حارث رؤف بیٹنگ کیلئے آئے تاہم باؤنسر لگنے سے کنکشن کا شکار ہوکر ریٹائر ہرٹ ہوگئے۔

کنکشن رولز کے تحت نسیم شاہ نے فاسٹ بولر حارث رؤف کی جگہ بیٹنگ کی اور کیویز کیخلاف اپنے کیریئر کی پہلی نصف سنچری بنائی اور 51 رنز کی اننگز کھیلی، جس میں 4 چوکے اور 4 چھکے شامل تھے۔

نسیم شاہ کے 4 چھکے کسی بھی نمبر 11 بیٹر کی جانب سے اننگز میں لگائے گئے چھکوں کی مشترکہ طور پر سب سے بڑی تعداد تھی ۔

اس سے قبل سابق فاسٹ باولر محمد عامر نے 2016ء میں انگلینڈ کیخلاف اپنی 58 رنز کی باری کے دوران 4 چھکے لگائے تھے۔

(جاری ہے)

حارث رئوف نے ورلڈ کپ 2023ء میں انگلینڈ کیخلاف بطور نمبر 11 بیٹر 3 چھکے لگائے تھے، سابق کیوی پیسر شین بانڈ نے 2003ء میں بھارت اور شعیب اختر نے ورلڈ کپ 2003ء میں انگلینڈ کیخلاف بطور نمبر 11 بیٹر 3،3 چھکے لگائے تھے۔

انٹرنیشنل کرکٹ میں یہ دوسرا موقع تھا جب کسی بھی نمبر 11 کے بیٹر نے نصف سنچری بنائی۔ اس سے قبل سابق فاسٹ باولر محمد عامر نے 2016ء میں انگلینڈ کیخلاف 58 رنز سکور کیے تھے، سابق سپیڈ سٹار شعیب اختر نے ورلڈ کپ 2003ء میں انگلینڈ کیخلاف ہی 43 رنز سکور کیے تھے۔