اسلام اور دین حق کے خلاف کی جانے والی سازشوں کا موثر انداز میں مقابلہ کرنے کے لیے اتحاد کی ضرورت ہے، مفتی خرم رحمانی

جمعرات 3 اپریل 2025 21:55

کراچی (اُردو پوائنٹ اخبارتازہ ترین - این این آئی۔ 03 اپریل2025ء)لانڈھی کی قدیمی مرکزی عید گاہ حنفیہ عالمگیر جامع مسجد ٹرسٹ میں عید الفطر کی نماز کا ایک عظیم الشان اجتماع منعقد ہوا جس میں علماء و مشائخ ،سیاسی و سماجی معززین اور عوام الناس کی کثیر تعداد نے شرکت کی۔اجتماع سے خطاب کرتے ہوئے مفتی خرم اقبال رحمانی نے کہا کہ آج ہمیں اتحاد اور یکجہتی کی پہلے سے زیادہ ضرورت ہے تاکہ اسلام اور دین حق کے خلاف کی جانے والی سازشوں کا موثر انداز میں مقابلہ کیا جا سکے ۔

غیر مسلم قوتیں مختلف حربوں کے ذریعہ امت مسلمہ کو کمزور کرنے کی کوششیں کر رہی ہیں۔لہذا ہمیں باہمی اختلافات بھلا کر یکجہتی اور اخوت کے جذبہ کے ساتھ ان چیلنجز کا سامنا کرنا ہوگا۔ امت کا تحاد اور عروج فقط اللہ اور اسکے رسول ﷺکے احکامات کی پیروی کرنے سے مشروط ہے ۔

(جاری ہے)

رسول کریم ﷺ کی اطاعت ہی اللہ کی اطاعت ہے۔قرآن و سنت دین کے بنیادی مآخذ ہیں رسول اللہ ﷺ نے فرمایا میں تمہارے درمیان دو چیزیں چھوڑ کر جا رہا ہوں جب تک ان کو مضبوطی سے تھام کر رکھو گے کبھی گمراہ نہیں ہوگے ایک قرآن اور دوسرا میری سنت۔

مفتی صاحب نے مزید کہا کہ عوا م الناس قرآن و سنت کی تعلیم عام کرنے والے اداروں کی سرپرستی کریں تاکہ معاشرہ کو اچھے اور قابل حفاظ قرآن اور علماء اسلام میسر آئیں۔ٹرسٹ کے جنرل سیکرٹری الحاج محمد سعید خان صابری نے ادارہ کی تازہ ترین رپورٹ پیش کی جس میں اس کے مختلف شعبوں کی کارکردگی فلاحی تعلیمی اور دینی سرگرمیوںکے حوالے سے تفصیلات پیش کیں۔

ان کہنا تھا کہ ہم پوری مسجدکو سولر سسٹم پر لانا چاہتے ہیں جس کے لیے تقریبا 75 کلو واٹ کے سسٹم کی ضرورت ہے۔ جامعہ سلیم کی دوسری منزل کی چھت ڈالنے کے لیے صاحب ثروت حضرات تعاون کریں اگر کوئی صاحب خود تمام کام کرانا چاہتے ہیں تو ادارہ انہیں خوش آمدید کہے گا۔ سرد خانہ کے لیے ایمبولینس اور میت گاڑی کی اشد ضرورت ہے ادارہ کی کوششیں مسلسل جاری ہیںاور مزید ترقی کے لیے عوام کا تعاون درکار ہے۔علامہ مولانا سید فیض رسول شاہ قادری نے نماز کی امامت کے فرائض ادا کیے اور اجتماعی دعا کرتے ہوئے اسلام کی سر بلندی اور پاکستان کی حفاظت و ترقی کے لیے خصوصی دعائیں کیں۔ عوام نے آمین کی صدائیں بلند کیں۔