رمضان المبارک کے دوران مسجد الحرام میں گالف کارٹس استعمال کرنے والے زائرین کی تعداد 10 لاکھ سے بڑھ گئی، سعودی حکام

جمعہ 4 اپریل 2025 10:00

مکہ مکرمہ (اُردو پوائنٹ اخبارتازہ ترین - اے پی پی۔ 04 اپریل2025ء) سعودی عرب کے شہر مکہ مکرمہ میں مقدس ترین مقام مسجد الحرام میں رمضان المبارک کے دوران گالف کارٹس استعمال کرنے والے زائرین کی تعداد 10 لاکھ سے زیادہ رہی ۔

(جاری ہے)

ایس پی اے کے مطابق ادارہ امور الحرمین الشریفین نے اپنے آفیشل اکاؤنٹ ایکس (ٹوئٹر) پر کہا ہے کہ رمضان المبارک کے دوران مسجد الحرام میں گالف کارٹس سروس استعمال کرنے والوں کی تعداد 10 لاکھ 14 ہزار 137 سے زیادہ رہی۔

رمضان المبارک کی 27 ویں شب کو 57 ہزار سے زیادہ افراد کو گالف کارٹس سروس فراہم کی گئی۔گالف کارٹس سے عمرہ کرنے کی سہولت خاص طور پر بزرگوں اور خصوصی افراد کے لیے ہے تاکہ وہ مسجد الحرام میں ہجوم کے درمیان آسانی سے اپنا عمرہ کرسکیں۔واضح رہے کہ گالف کارٹ سے طواف کے لیے ایک زائر کا کرایہ 50 ریال جبکہ سعی کے لیے 50 ریال مقرر ہیں۔ واضح رہے کہ ایک گالف کارٹ میں کم از کم 6 افراد کی گنجائش ہوتی ہے۔