پاک آزربائیجان قربتیں بڑھنے لگیں‘آزربائیجان کا پاکستان میں 2 ارب ڈالرز سرمایہ کاری پر غور آخری مراحل میں داخل

جمعہ 4 اپریل 2025 22:35

اسلام آباد(اُردو پوائنٹ اخبارتازہ ترین - آن لائن۔ 04 اپریل2025ء) پاک آزربائیجان تعلقات اور قربتیں بڑھنے لگی ہیں اورآزربائیجان کی جانب سے پاکستان میں 2 ارب ڈالرز سرمایہ کاری منصوبوں پر غور آخری مراحل میں داخل ہوگیا ہے اور امکان ہے کہ آذربائیجان کے صدر کے دورہ پاکستان میں اہم معاہدوں پر دستخط کئے جائیں گے۔ سفارتی ذرائع کے مطابق آزربائیجان کے صدر الہام علئیوف رواں ماہ پاکستان کا اہم دورہ کر رہے ہیں‘آزربائیجان کے صدر کے دورہ پاکستان کے حوالے سے تیاریاں مکمل کی جا رہی ہیں۔

آزربائیجانی صدر 26, 27 اپریل کو اسلام آباد میں موجود ہوں گے۔سفارتی ذرائع کے مطابق ٴْآزربائیجان کے صدر سے پہلے آزربائیجان کے سینئر وزیر اسلام آباد پہنچیں گے۔آزربائیجان کے وزیر اقتصادیات و سرمایہ کاری میکائیل جباروو کی آیندہ جمعرات 8 اپریل کو اسلام آباد آمد متوقع ہے۔

(جاری ہے)

میکائیل جباروو دورہ پاکستان میں نائب وزیر اعظم اسحاق ڈار سے ملاقات کریں گے۔

آزربائیجانی صدر کے دورے میں دونوں ممالک کے مابین موٹرویز ایم 6, ایم 6, انفراسٹرکچر اور پیٹرولیم کے شعبوں میں اہم معاہدے متوقع ہیں۔آزربائیجانی فضائیہ پاکستان سے جے ایف 17 بلاک 3 لڑاکا طیاروں کی بھی خریدار ہے‘دونوں ممالک میں روابط کے فروغ، ٹرانسپورٹ، توانائی، دفاعی پیداوار اور صنعتی شعبے میں بھی تعاون کے فروغ کو حتمی شکل دی جا رہی ہے۔

وزہر اعظم آزربائیجان کے ساتھ ہونے والے معاہدوں کی ذاتی طور پر نگرانی کریں گے۔دونوں ممالک میں اسٹریٹیجک تعاون کے فروغ میں میں اضافہ کیا جائے گا۔سفارتی ذرائع کے مطابق گذشتہ چند برسوں میں دونوں ممالک میں اعلی سطح دوروں میں اضافہ ہوا ہے۔وزیر اعظم شہباز شریف نے رواں برس فروری میں باکو کا اہم دورہ کیا۔ جبکہ آزربائیجانی صدر الہام علئیوو بھی گذشتہ برس اسلام آباد آئے تھے۔