تیسرا ون ڈے، امام الحق چہرے پرگیند لگنے سے بری طرح زخمی

گیند امام کے جبڑے پر لگی، کن کشن ٹیسٹ پاس نہیں کرسکے، انکی جگہ عثمان خان بیٹنگ کریں گے : ٹیم مینجمنٹ

ذیشان مہتاب ہفتہ 5 اپریل 2025 10:15

تیسرا ون ڈے، امام الحق چہرے پرگیند لگنے سے بری طرح زخمی

ماونٹ ماونگوری (اردو پوائنٹ تازہ ترین اخبار ۔ 5 اپریل 2025ء ) نیوزی لینڈ کے خلاف تیسرے ون ڈے میں پاکستان کی بیٹنگ کے دوران اوپنربلےباز امام الحق چہرے پرگیند لگنے سے زخمی ہوگئے اور انہیں گراؤنڈ سے باہر جانا پڑ گیا۔

تفصیلات کے مطابق ماؤنٹ مونگانوئی میں تیسرا ون ڈے انٹرنیشنل کھیلا جارہا ہے جس میں امام الحق کی ایک شاٹ پر فیلڈر کی تھرو ان کے ہیلمٹ کی گرل سے ہوتی ہوئی ان کے چہرے پر جالگی۔

گیند چہرے پر لگنے کے باعث امام الحق ریٹائرڈ ہرٹ ہوکر میدان سے باہر چلے گئے۔

ٹیم مینجمنٹ کا کہنا ہے کہ گیند امام الحق کے جبڑے پر لگی، امام الحق کن کشن ٹیسٹ پاس نہیں کرسکے، امام الحق کی جگہ عثمان خان بیٹنگ کریں گے۔

ٹیم مینجمنٹ کے مطابق امام الحق کو گراؤنڈ میں موجود ایمرجنسی سینٹر میں طبی سہولت دی جا رہی ہے، ضرورت پڑنے پرامام الحق کواسپتال لےجایا جائے گا۔

(جاری ہے)

خیال رہے کہ نیوزی لینڈ نے پاکستان کو تیسرے ایک روزہ میچ میں جیت کے لیے 42 اوورز میں 265 رنز کا ہدف دیا ہے۔ نیوزی لینڈ کو تین ایک روزہ میچوں کی سیریز میں دو صفر کی فیصلہ کن سبقت حاصل ہے۔

اس سے قبل دوسرے ایک روزہ میچ میں بیٹنگ کے دوران حارث رؤف کو بھی ہیلمٹ پر گیند لگی تھی جس کے بعد وہ کن کشن کے باعث گراؤنڈ سے باہر چلے گئے تھے اور ان کی جگہ نسیم شاہ نے بیٹنگ کی تھی۔