جنوبی کوریا ، عدالت نے مارشل لا لگانے والے صدر یون سک یول کو برطرف کر دیا

ہفتہ 5 اپریل 2025 10:20

سیئول (اُردو پوائنٹ اخبارتازہ ترین - اے پی پی۔ 05 اپریل2025ء) جنوبی کوریا کی آئینی عدالت نے ملک میں مارشل لا لگانے والے صدر یون سک یول کے خلاف مواخذے کی توثیق کرتے ہوئے انہیں عہدے سے برطرف کر دیا ہے۔ اے ایف پی کے مطابق 64 سالہ یون سک یول کی جانب سے 3 دسمبر کو سویلین حکومت کو معطل کرنے کی کوشش کی گئی تھی اور پارلیمان میں مسلح اہلکاروں کو تعینات کیا گیا جنہیں بعد ازاں بغاوت کے مقدمے کے تحت گرفتار کیا گیا ۔

(جاری ہے)

عدالت کے قائم مقام صدر مون ہیونگ بائے نے فیصلے میں کہا کہ آئینی خلاف ورزیوں اور ان کے سنگین نتائج کے پیش نظر یون سک یول کو برطرف کیا جاتا ہے۔یون سک یول کو ہٹائے جانے کے فیصلے کے بعد نئے صدارتی انتخابات کی راہ ہموار ہو گئی ہے جو 60 دن کے اندر منعقد کروایا جانا لازمی ہے۔ انتخابات کی تاریخ کا اعلان آئندہ چند روز میں کیا جائے گا۔مقدمے کی سماعت کرنے والے تمام ججوں نے متفقہ طور پر صدر کو برطرف کرنے کا فیصلہ سنایا ہے ۔ واضح رہے کہ متفقہ فیصلہ سنانے والے سپریم کورٹ کے ججز کو اضافی سکیورٹی فراہم کی گئی تھی۔