8 ماہ میں خدمات کی برآمدات 6.04 فیصد بڑھ کر 5.46 ارب ڈالر تک پہنچ گئیں

لاہور(اُردو پوائنٹ اخبارتازہ ترین - این این آئی۔ 05 اپریل2025ء) رواں مالی سال کے پہلے آٹھ ماہ میں پاکستان کی خدمات کی برآمدات 6.04 فیصد اضافے کے ساتھ 5 ارب 46 کروڑ ڈالر رہیں جو گزشتہ سال کے اسی عرصے میں 5 ارب 15 کروڑ ڈالر تھیں۔رپورٹ کے مطابق ٹیلی کمیونیکیشن، کمپیوٹر اور انفارمیشن سروسز نے رواں مالی سال میں ترقی میں اہم کردار ادا کیا، فروری 2024 کے بعد سے خدمات کی برآمدات میں مثبت اضافہ دیکھا گیا ہے، تاہم اگست 2024 میں اس میں 6.50 فیصد کمی آئی تھی۔

اعداد و شمار کے مطابق مالی سال 25 کے 8 ماہ کے دوران برآمدات 3.50 فیصد اضافے کے ساتھ ایک ہزار 519 ارب روپے رہیں جو مالی سال 24 کے 8 ماہ میں ایک ہزار 468 ارب روپے تھیں۔فروری میں خدمات کی برآمدات 5 فیصد اضافے کے ساتھ 70 کروڑ 9 لاکھ 96 ہزار ڈالر رہیں، جو گزشتہ سال اسی مہینے میں 67 کروڑ 6 لاکھ 17 ہزار ڈالر تھیں۔

(جاری ہے)

رپورٹ کے مطابق مالی سال 25 کے جولائی تا فروری کے دوران ٹیلی کمیونیکیشن، کمپیوٹر اور انفارمیشن سروسز کی برآمدات 2 ارب 48 کروڑ 20 لاکھ ڈالر تک پہنچ گئیں، جو ایک سال قبل ایک ارب 97 کروڑ 80 لاکھ ڈالر تھیں، جو 25.48 فیصد اضافے کو ظاہر کرتی ہیں۔

مالی سال 25 کے 8 ماہ کے دوران دیگر کاروباری خدمات کی برآمدات 1.42 فیصد اضافے کے ساتھ ایک ارب 73 ہزار ڈالر رہیں، جو گزشتہ سال کے اسی عرصے میں ایک ارب 58 ہزار ڈالر تھیں، تاہم مالی سال 2025 کے 8 ماہ میں ٹرانسپورٹ سروسز کی برآمدات 6.50 فیصد کم ہو کر 61 کروڑ 80 لاکھ ڈالر رہ گئیں، جو ایک سال قبل 66 کروڑ 10 لاکھ ڈالر تھیں۔ٹریول سروسز کی برآمدات میں 2.74 فیصد کا منفی اضافہ ریکارڈ کیا گیا، اور یہ 49 کروڑ 60 لاکھ ڈالر رہیں، جو ایک سال قبل 51 کروڑ ڈالر تھیں۔

رپورٹ کے مطابق فروری میں خدمات کی درآمدات 32.70 فیصد اضافے کے ساتھ ایک ارب 13 لاکھ ڈالر رہیں جو گزشتہ سال کے اسی مہینے کے مقابلے میں 76 کروڑ 30 لاکھ، 42 ہزار ڈالر تھیں، جولائی تا فروری مالی سال 25 کے دوران خدمات کی درآمدات 12.03 فیصد اضافے کے ساتھ 7 ارب 70 کروڑ ڈالر رہیں، جو گزشتہ سال کے اسی عرصے کے مقابلے میں 6 ارب 88 کروڑ ڈالر تھیں۔درآمدات میں اضافہ بنیادی طور پر نقل و حمل اور سفری خدمات کی وجہ سے ہے، نقل و حمل کی ادائیگیوں میں اضافے کی وجہ ہوائی مسافروں کے کرایوں میں اضافہ ہے۔

مالی سال 2025 کے 8 ماہ کے دوران ٹرانسپورٹ سروسز کی درآمدات 3 ارب 38 کروڑ 60 لاکھ ڈالر تک پہنچ گئیں، جو گزشتہ سال کے اسی عرصے میں 3 ارب 96 لاکھ ڈالر تھیں، جو 9.36 فیصد اضافہ ہے۔اسی طرح سفری خدمات کی درآمد14.77 فیصد اضافے کے ساتھ ایک ارب 66 کروڑ ڈالر رہیں، جو ایک سال قبل ایک ارب 44 کروڑ ڈالر تھیں۔خدمات کی درآمدات مالی سال 24 میں 17.14 فیصد اضافے کے ساتھ 10 ارب 11 کروڑ ڈالر رہیں، جو گزشتہ سال کے اسی عرصے میں 8 ارب 63 کروڑ ڈالر تھیں۔

جولائی تا فروری مالی سال 25 کے دوران خدمات کے شعبے میں تجارتی خسارہ 29.85 فیصد اضافے کے ساتھ 2 ارب 25 کروڑ ڈالر رہا، جو گزشتہ سال کے اسی مہینے میں ایک ارب 73 کروڑ ڈالر تھا۔فروری میں خدمات کے شعبے میں تجارتی خسارہ 247.37 فیصد اضافے کے ساتھ 30 کروڑ ڈالر سے زائد رہا، جو گزشتہ سال کے اسی مہینے کے مقابلے میں 8 کروڑ 70 لاکھ ڈالر تھا۔