بجلی نرخوں میں کمی سے اقتصادی ترقی کو فروغ ملے گا،عوام سکھ کا سانس لیں گے، نائب صدر لاہور چیمبر

ہفتہ 5 اپریل 2025 19:48

لاہور (اُردو پوائنٹ اخبارتازہ ترین - اے پی پی۔ 05 اپریل2025ء) لاہور چیمبر آف کامرس اینڈ انڈسٹری کے نائب صدر شاہد نذیر چوہدری نے بجلی کے ٹیرف میں کمی کے فیصلے کا خیر مقدم کرتے ہوئے کہا ہے کہ اس سے صنعتوں کے لیے مجموعی پیداواری لاگت کم ہو گی اور پاکستانی مصنوعات عالمی مارکیٹوں میں زیادہ مسابقتی بن جائیں گی۔ ہفتہ کو اپنے ایک بیان میں انہوں نے کہا کہ مہنگی بجلی طویل عرصہ سے صنعتکاروں کے لیے ایک بہت بڑا بوجھ اور بین الاقوامی سطح پر مقابلہ کرنے کی صلاحیت محدود ہو چکی تھی۔

(جاری ہے)

ٹیرف میں کمی کے بعد صنعتی پیداوار میں اضافہ ہو گا، سرمایہ کاری راغب اور روزگار کے مواقع پیدا ہوں گے جس سے اقتصادی ترقی کو فروغ ملے گا۔ انہوں نے کہا کہ وزیراعظم محمد شہباز شریف کا بجلی کے ٹیرف میں کمی کا فیصلہ صنعتی صارفین اور عوام دونوں کے لیے بڑا ریلیف ہے۔ یہ فیصلہ اقتصادی استحکام میں معاون ثابت ہو گا کیونکہ اس سے صارفین کی قوت خرید میں اضافہ اور تمام شعبوں میں مالی دبائو کم ہوگا۔ انہوں نے کہا کہ طویل عرصہ بعد بجلی کی قیمتوں میں کمی ایک اہم تبدیلی ثابت ہو گی جس سے صنعتی ترقی کو فروغ ملے گا اور عوام سکھ کا سانس لیں گے۔