بابر اعظم نیوزی لینڈ کیخلاف سب سے زیادہ انٹرنیشنل رنز سکور کرنے والے پاکستانی بیٹر بن گئے

سابق کپتان نے 3 میچز میں 43 کی اوسط سے سب سے زیادہ 129 رنز بنائے، اس میں 2 نصف سنچریاں شامل رہیں

ذیشان مہتاب اتوار 6 اپریل 2025 20:17

لاہور (اردو پوائنٹ تازہ ترین اخبار ۔ 6 اپریل 2025ء ) قومی ٹیم کے سابق کپتان بابر اعظم نیوزی لینڈ کیخلاف سب سے زیادہ انٹرنیشنل رنز سکور کرنے والے پاکستانی بیٹر بن گئے۔

بابر اعظم نے 3 میچز میں 43 کی اوسط سے سب سے زیادہ 129 رنز بنائے، اس میں 2 نصف سنچریاں شامل رہیں، ان کی بہترین انفرادی کاوش 78 رنز رہی، البتہ وہ کوئی میچ فنش نہ کر پائے اور پاکستان کو کلین سویپ کا سامنا کرنا پڑا۔

بابر اعظم اب کیویز کیخلاف تینوں فارمیٹس کی 63 اننگز میں 2626 رنز سکور کرچکے ہیں، جاوید میانداد 49 اننگز میں 2621 رنز سکور کرکے اس فہرست میں دوسرے، انضمام الحق 61 اننگز میں 2342 رنز بنا کر تیسرے جب کہ سلیم ملک 70 اننگز میں 2000 رنز سکور کرکے اس فہرست میں چوتھے نمبر پر ہیں۔

واضح رہے کہ نیوزی لینڈ کیخلاف ون ڈے سیریز میں فہیم اشرف نے 2 میچز کھیل کر 38 کی اوسط سے 76 رنز نام بنائے، سلمان علی آغا نے 3 مواقع ملنے پر 26 کی اوسط سے 78 رنز بنائے، ان کی بہترین کاوش 58 رنز رہی۔

(جاری ہے)

عثمان خان نے 2 میچز میں 25.50 کی اوسط سے 51 رنز بنائے، ان کی بہترین اننگز 39 رنز رہی۔ کپتان محمد رضوان نے 3 میچز میں 24 کی اوسط سے 72 رنز نام بنائے، ان کی بہترین کاوش 37 رنز رہی، عبداللہ شفیق نے سیریز کے تینوں میچز کھیل کر مجموعی طور پر 72 رنز اسکور کیے، ان کی اوسط 23.33 رہی، 36 بہترین اننگز شمار ہوئی۔

نسیم شاہ نے ٹیل اینڈرز میں بہترین کارکردگی کا مظاہرہ کرتے ہوئے اس بار 3 میچز میں 68 رنز اسکور کیے، ان کی اوسط 22.66 رہی، انھوں نے ایک ففٹی بھی بنائی، طیب طاہر نے 15.66کی اوسط سے 47 رنز بنائے، جس میں 33 بہترین اننگز شمار ہوئی، سفیان مقیم 15، عاکف جاوید 10 جبکہ حارث رئوف اور امام الحق 4،4 رنز بنا سکے۔

بولنگ میں عاکف جاوید نے سب سے زیادہ 7 وکٹیں اڑائیں، انھوں نے 3 میچز میں 165 رنزکے عوض اتنے شکار کیے، فی وکٹ اوسط 23.57 رہی، عرفان خان 51 رنز دے کر 3 وکٹیں اڑائیں، ان کی اوسط 17 رنز رہی، سفیان مقیم نے 2 میچز میں78 رنز دے کر 3 شکار کیے، حارث رئوف نے 20 اوورز میں 113 رنز دے کر 3 وکٹیں لیں، نسیم شاہ نے 114 رنز دے کر 3 پلیئرز کومیدان بدر کیا، فہیم اشرف اور محمد وسیم نے 2،2 کھلاڑیوں کو پویلین بھیجا۔