Live Updates

پی ٹی آئی انتشارکا شکار‘ بانی کی رہائی کا خواب دیکھنا محض فریب ہے‘ شیرافضل مروت

پیر 7 اپریل 2025 15:11

اسلام آباد(اُردو پوائنٹ اخبارتازہ ترین - این این آئی۔ 07 اپریل2025ء)پاکستان تحریک انصاف کے سابق رہنما اور رکن قومی اسمبلی شیر افضل مروت نے کہا ہے کہ عمران خان سمیت پی ٹی آئی کے موناٹائزڈ سوشل میڈیا اکاؤنٹس کا کبھی آڈٹ نہیں ہوا، ان لوگوں نے قسط وار کہانیاں گڑھی ہوتی ہیں، جب مخالفین کے خلاف خبریں کم پڑجاتی ہیں تو اپنوں کے پیچھے پڑ جاتے ہیں، اداروں سے ٹکراؤ کی پالیسی، کردار کشی اور گالم گلوچ کے کلچرسے پی ٹی آئی کو رسوائی ملی۔

رکن قومی اسمبلی شیر افضل مروت پارٹی کی موجودہ حالت، سوشل میڈیا ٹیموں کے رویے اور قیادت کی غیر موجودگی پر سخت تنقید کرتے ہوئے کہا کہ پی ٹی آئی اس وقت انتشار کا شکار ہے اور اس حال میں بانی کی رہائی کا خواب دیکھنا محض ایک فریب ہے۔

(جاری ہے)

شیر افضل مروت نے پی ٹی آئی کے سوشل میڈیا اکاؤنٹس پر تنقید کرتے ہوئے کہا کہ عمران خان کا اکاؤنٹ بھی موناٹائزڈ ہے، پی ٹی آئی کے موناٹائزڈ اکاؤنٹس کا کبھی آڈٹ نہیں ہوا، کئی لوگوں کی آنکھوں پر ڈالرز کی پٹی بندھی ہے، یہ لوگ سراسر جھوٹ بولتے ہیں۔

رکن قومی اسمبلی نے مزید کہا کہ گالم گلوچ کے کلچر نے پی ٹی آئی کو رسوائی دی، ہماری شناخت ایک بدتمیز اور لڑائی جھگڑے والے گروہ کی بن گئی، اسی وجہ سے ہمیں انتشاری کہا جاتا ہے، ان لوگوں نے قسط وار کہانیاں گڑھی ہوتی ہیں، جب مخالفین کے خلاف خبریں کم پڑجاتی ہیں تو اپنوں کے پیچھے پڑ جاتے ہیں۔شیر افضل مروت کا کہنا تھا کہ ہر لیڈر نے سوشل میڈیا ٹیم بنائی ہوئی ہے اور عثمانی جنگوں کی طرح جنگیں ہوتی ہیں، ایک دوسرے کے خلاف گالم گلوچ ہوتی ہے، کہاں گئی قیادت ، کیا اتنا منتشر ہوکر یہ بانی چیئرمین پی ٹی آئی عمران خان کو رہا کرائیں گی جو ایک سپاہی کے ڈنڈے کی وجہ سے گھر سے نہیں نکلتے، کیا یہ لوگ انقلاب لائیں گی یہ نظر بھی نہیں آئیں گے، پی ٹی آئی کے پاس عمران خان کی رہائی کے لیے کوئی لائحہ عمل نہیں ہے۔