امیت شاہ کے دورہ مقبوضہ جموں وکشمیر کے خلاف مظفر آباد میں احتجاجی مظاہرہ

کشمیری عوام بھارتی وزیر داخلہ کے دورہ کشمیر کو مسترد کرتے ہیں،مقررین کا خطاب

پیر 7 اپریل 2025 16:57

مظفرآباد(اُردو پوائنٹ اخبارتازہ ترین - این این آئی۔ 07 اپریل2025ء)بھارتی وزیر داخلہ امیت شاہ کے دورہ مقبوضہ جموں و کشمیر کے خلاف مظفرآباد میں پاسبان حریت جموں و کشمیر کے زیرِ اہتمام ایک احتجاجی مظاہرہ ہوا۔کشمیرمیڈیاسروس کے مطابق مظاہرے میں خواتین سمیت شہریوں کی بڑی تعداد نے شرکت کی ۔مظاہرین نے بینرز اور کتبے اٹھا رکھے تھے جن پر بھارتی وزیر داخلہ کے دورہ مقبوضہ جموں و کشمیر کی مذمت کی گئی۔

مظاہرین نے سیاہ جھنڈے لہرا کر احتجاج کیا اوروہ ’’جس کشمیر کو خون سے سینچا وہ کشمیر ہمارا ہے‘‘، ’’ہم چھین کے لیں گے آزادی ‘‘، ’’نامنظور نامنظور بھارتی قبضہ نامنظور‘‘جیسے نعرے لگا رہے تھے۔ اس موقع پر مقررین نے خطاب کرتے ہوئے کہاکہ کشمیری عوام بھارتی وزیر داخلہ کے دورہ کشمیر کو مسترد کرتے ہیں ۔

(جاری ہے)

انہوں نے کہاکہ امیت شاہ 5 اگست 2019کے غیر قانونی اقدامات کاذمہ دار ہے اور کشمیری عوام ایسے شخص کو قابلِ نفرت سمجھتے ہیں ۔

مقررین نے کہاکہ بھارتی حکمران جان لیں کشمیری عوام بھارت کے جبری قبضے کو کبھی تسلیم نہیں کریں گے ۔انہوں نے کہاکہ آزاد کشمیر کے عوام مقبوضہ جموں و کشمیر پر بھارتی فوجی قبضے اورجارحیت کومسترد کرتے ہیں۔ انہوں نے کہاکہ امیت شاہ ایک دہشت گرد ہے اورمقبوضہ جموں و کشمیر میں اس کو کوئی خوش آمد نہیں کہے گا۔انہوں نے کہاکہ کشمیری خواتین بھارتی جبرواسبتداد کے سامنے سیسہ پلائی ہوئی دیوار بن کر کھڑی ہیں۔احتجاجی مظاہرے سے پاسبان حریت کے چیئرمین عزیر احمد غزالی ، وائس چیئرمین عثمان علی ہاشم ، شعبہ خواتین کی سربراہ مہناز قریشی ، پیپلز پارٹی کے رہنماشوکت جاوید میر،جماعت اسلامی کے رہنماسید سلیم شاہ،ڈائریکٹر کشمیر لبریشن سیل راجہ سجاد لطیف خان اوردیگر نے خطاب کیا۔