سعودی عرب، منشیات کے 2 غیرملکی سمگلروں کو سزائے موت

ایوان شاہی کے حکم پر دونوں سمگلروں کو سزائے موت دے دی گئی،وزارت داخلہ

پیر 7 اپریل 2025 17:34

مدینہ منورہ(اُردو پوائنٹ اخبارتازہ ترین - این این آئی۔ 07 اپریل2025ء)سعودی عرب کی وزارت داخلہ نے کہا ہے کہ مشرقی علاقے اور مدینہ منورہ میں منشیات کی سمگلنگ میں ملوث 2 غیرملکیوں کو سزائے موت دے دی گئی۔

(جاری ہے)

عرب ٹی وی کے مطابق سکیورٹی حکام نے مملکت میں ہیروئن سمگل کرنے والے ایک بھارتی شہری سکھجندر سنگھ کو گرفتار کیا اور اس نے تفتیش کے دوران اپنے جرم کا اعتراف کرلیا جس پر اسے عدالت میں پیش کردیا گیا جہاں عدالت نے اقبالی بیان اور شواہد کی بنیاد پر اسے سزائے موت کا حکم دے دیا۔

دوسری جانب مدینہ منورہ میں سکیورٹی فورس نے نائیجیریا کے ایک شہری کو کوکین سمگل کرنے پر گرفتار کرلیا۔ اور ابتدائی تحقیقات کے دوران اس نے اپنا جرم قبول کرلیا جس پر اس کا چالان عدالت میں پیش کردیا گیا۔عدالت نے اقبالی بیان اور شواہد کے بعد اسے سزائے موت دینے کا حکم صادر کردیا۔ عدالتی فیصلے کے بعد ایوان شاہی کے حکم پر دونوں سمگلروں کو گزشتہ روز سزائے موت دے دی گئی۔