اینٹوں کے بھٹوں کی صنعت کی میکانائز یشن مزدوروں کے استحصال کے دور کو ختم کرنے کی طرف پہلا قدم ہے،اشرف مال

منگل 8 اپریل 2025 11:05

مکوآنہ (اُردو پوائنٹ اخبارتازہ ترین - این این آئی۔ 08 اپریل2025ء)غیر سرکاری تنظیم پاکستان پارٹنر شپ انیشی ایٹو (پی پی آئی)کے سی ای او اشرف مال نے کہا کہ ان کامقصد پاکستان میں اینٹوں کے بھٹے کی پوری صنعت کو میکانائز کرنا ہے جو مزدوروں کے استحصال کے دور کو ختم کرنے کی طرف پہلا قدم ہے۔ ان خیالات کا اظہار انہوں نے پاکستان پارٹنر شپ انیشی ایٹواورفیلمزسیٹ فری(ایف ایس ایف)کے تعاون سے چک نمبر113فیصل آبادمیں مقامی بھٹہ پر لگائی گئی خود کار مشین کے افتتاح کے موقع پر تقریب سے خطاب کرتے ہوئے کیا۔

اس موقع پر رکن پنجاب اسمبلی اعجاز عالم آگسٹین نے پی پی آئی اور ایف ایس ایف کی کوششوں کو سراہتے ہوئے اس اقدام کو اینٹوں کی بھٹہ صنعت کے لئے اہم تبدیلی کا قدم قرار دیا۔

(جاری ہے)

ایف ایس ایف کے صدر مائیک برکلے نے کہاکہ میکنائزیشن خواتین اور بچوں کو اینٹ سازی کے بوجھ سے آزاد کر دے گی۔انہوں نے کہا کہ ان کامقصد نہ صرف صنعت کو جدید بنانا بلکہ آزاد خاندانوں کو بااختیار بنانا بھی ہے جس سے انہیں پائیدار مستقبل کی تعمیر میں مدد ملے گی۔

تقریب میں شریک بھٹہ مالکان نے اینٹوں کے بہتر معیار، پیداواری صلاحیت میں اضافہ اور برآمدات کے امکانات کا حوالہ دیتے ہوئے میکنائزیشن کی طرف تبدیلی کا خیرمقدم کیا۔تقریب میں یو ایف کے رکن ڈاکٹر سلامت،کرسچین جرنلسٹس ایسوسی ایشن آ ف پاکستان کے عہدیداران و ممبران، صحافی اور اینٹوں کے بھٹہ مالکان نے شرکت کی۔ بعدازاں 250 افراد پر مشتمل42خاندانوں کو اینٹوں کے بھٹوں پرمزدوری سے فارغ ہونے پرایک ایک رکشہ بھی فراہم کیا گیا۔دریں اثناشہریوں نے پی پی ایف کے اس اقدام کو سراہتے ہوئے کہا کہ یہ اقدام پاکستان کی اینٹوں کے بھٹے کی صنعت کو تبدیل کرنے کے لئے اہم قدم ہے