بھارتی ریاست منی پور میں غیرمعینہ مدت کے لئے کرفیونافذ

منگل 8 اپریل 2025 12:35

امپھال (اُردو پوائنٹ اخبارتازہ ترین - اے پی پی۔ 08 اپریل2025ء) شورش زدہ بھارتی ریاست منی پور کے ضلع تھوبل میں غیر معینہ مدت کے لیے کرفیو نافذ کر دیا گیا۔ کشمیرمیڈیاسروس کے مطابق کرفیو ضلع کے حلقہ انتخاب لیلونگ میں وقف ترمیمی ایکٹ کی حمایت کرنے پر ہجوم کی طرف سے بی جے پی اقلیتی مورچہ کے ریاستی صدر کے گھر کو آگ لگانے کے بعد نافذ کیاگیا ہے۔

(جاری ہے)

تھوبل ڈسٹرکٹ مجسٹریٹ اے سبھاش سنگھ نے میڈیا کو بتایاہے کہ سپرنٹنڈنٹ آف پولیس کے مطابق اتوار کی شام کو تقریباً 7ہزار سے زائدمظاہرین نے بی جے پی رہنما محمد اسکرونگ علی کے گھر پر دھاوابولاتھا جس کے بعد سے لیلونگ اسمبلی حلقہ اور اس کے نواحی علاقوں میں صورتحال انتہائی کشیدہ ہے جس کے باعث علاقے میں غیرمعینہ مدت کے لئے کرفیو نافذ کردیاگیاہے۔ بی جے پی لیڈر محمد اسکرونگ علی نے ہفتہ کو سوشل میڈیا پر اپنی پوسٹ کے ذریعے وقف ترمیمی ایکٹ 2025کی حمایت کی تھی۔ منی پور کے وادی کے مختلف علاقوں میں بھی اس متنازعہ قانون کے خلاف مظاہرے کئے گئے ہیں ۔وقف ترمیمی ایکٹ کے خلاف امپھال ایسٹ اور تھوبل اضلاع کے دیگر مسلم اکثریتی علاقوں میں بھی احتجاجی مظاہرے کئے گئے ہیں ۔