پاکستان علاقائی تعاون اور تجارت کو فروغ دینے پر یقین رکھتاہے،وفاقی وزیر خزانہ و محصولات کی ای سی او کے سیکرٹری جنرل سے ملاقات میں گفتگو

منگل 8 اپریل 2025 14:40

اسلام آباد (اُردو پوائنٹ اخبارتازہ ترین - اے پی پی۔ 08 اپریل2025ء) وفاقی وزیر خزانہ و محصولات سینیٹر محمد اورنگزیب نے کہا ہے کہ پاکستان علاقائی تعاون اور تجارت کو فروغ دینے پر یقین رکھتاہے۔یہ بات انہوں نے اقتصادی تعاون تنظیم ( ای سی او)کے سیکرٹری جنرل ڈاکٹر اسد مجید خان سے ملاقات میں کہی۔ملاقات میں دونوں رہنماؤں نے علاقائی اقتصادی تعاون بڑھانے کے حوالے سے بات چیت کی۔

تنظیم کے 10 رکن ممالک کے درمیان تجارت، معیشت اور سیاحت کو فروغ دینے کے لئے مختلف اقدامات پر تبادلہ خیال ہوا۔ ڈاکٹر اسد مجید خان نے وزیر خزانہ کو ای سی او کے کردار اور اس کی اہمیت کے بارے میں آگاہ کیا۔ملاقات میں تجارتی راہداریوں اور ابھرتی ہوئی منڈیوں کے تناظر میں علاقائی تجارت اور روابط کی اہمیت پر زور دیا گیا۔

(جاری ہے)

دونوں رہنماؤں نے رکن ممالک کے مابین تعاون، علاقائی تجارت اور روابط کو مزید مستحکم کرنے کی ضرورت پر اتفاق کیا ۔

سیکرٹری جنرل نے تنظیم کو مزید مضبوط اور متحرک بنانے اور علاقائی تجارت کو فروغ دینے اور رکن ممالک کے درمیان تعاون میں مزید بہتری کے لئے اپنی کاوشوں کا ذکر کیا۔ وزیر خزانہ سینیٹر محمد اورنگزیب نے علاقائی تجارت اور روابط کے ایجنڈے کو فروغ دینے کے لئے تعاون کا یقین دلایا۔ملاقات میں تنظیم کے مختلف فورمز اور سرگرمیوں میں وزارت خزانہ کی نمائندگی کو مزید فعال بنانے پر بھی اتفاق کیا گیا۔