نو تعینات ڈائریکٹر جنرل ریسکیو 1122خیبرپختونخوا نے عہدے کا چارج سنبھال لیا

منگل 8 اپریل 2025 17:16

پشاور (اُردو پوائنٹ اخبارتازہ ترین - اے پی پی۔ 08 اپریل2025ء) ریسکیو 1122خیبرپختونخوا کے نئے تعینات ہونے والے ڈائریکٹر جنرل شاہ فہد نے عہدے کا چارج سنبھال لیا۔اس حوالے سے ریسکیو ہیڈکوارٹرپشاور میں تقریب کا انعقاد کیاگیا۔ریسکیو1122 کے چاق و چوبند دستے نے سلامی پیش کی۔ اس موقع پر سابق ڈائریکٹر جنرل ریسکیو1122 خیبرپختونخوا ڈاکٹر محمد ایاز خان نے نئے تعینات ہونے والے ڈائریکٹر جنرل شاہ فہد کو عہدے کی مبارکباد دی اور گلدستہ پیش کیا۔

اس موقع پر ڈائریکٹر جنرل شاہ فہد نے کہا کہ ریسکیو1122 خیبرپختونخوا کے بہترین اداروں میں سے ایک ہے اور ان اہلکاروں کی پیشہ وارانہ اور بروقت امدادی کارروائیوں اور بین الاقومی معیار کی خدمات سے لاکھوں انسانوں کے جان و مال کے تحفظ کو یقینی بنایا گیا ہے یہی وجہ ہے کہ قلیل وقت میں ریسکیو 1122 نے اپنا ایک منفرد مقام حا صل کیا ہے۔

(جاری ہے)

انہوں نے کہا کہ ریسکیو 1122 کے اہلکاروں کے ساتھ مل کر ایک ٹیم ورک کے طور پر کام جاری رکھوں گاجبکہ اصلاحات اور بہتری کے لیے سب کو خوش آمدید کہوں گا۔

انہوں نے کہاکہ ریسکیو اہلکار ادارے کا قیمتی سرمایہ ہیں جن کی بہتری کے لئے تمام وسائل بروئے کار لائے جائیں گے۔ انہوں نے کہا کہ اہلکاروں کی فلاح وبہبود کے لیے خصوصی اقدامات اور سروس کی بہتری کے لیے جامع پالیسی میں مزید بہتری لائی جائے گی۔