الیکشن کمیشن میں نئے تعینات الیکشن افسران کی ٹریننگ کا آغاز

بدھ 9 اپریل 2025 22:34

اسلام آباد(اُردو پوائنٹ اخبارتازہ ترین - این این آئی۔ 09 اپریل2025ء)الیکشن کمیشن نے 23نئے تعینات الیکشن افسران (بی ایس-17) کے لیے 13 ہفتوں پر مشتمل سروس ٹریننگ کا آغاز اپنی اکیڈمی میں مورخہ 9 اپریل 2025 سے شروع کردیا ہے۔اس تربیتی پروگرام کا اختتام 4 جولائی 2025 کو ہوگا۔ترجمان الیکشن کمیشن کے مطابق چیف الیکشن کمشنر سکندر سلطان راجہ نے اس تربیتی پروگرام کا باقاعدہ افتتاح کیا۔

اس افتتاحی تقریب میں معزز ممبران الیکشن کمیشن بھی شریک ہوئے۔ چیف الیکشن کمشنر نے اپنے افتتاحی کلمات میں نئے افسران کو الیکشن کمیشن میں تعیناتی پرمبارکباد دی اور خوش آمدید کہا۔ انہوں نے افسران پر واضح کیا کہ اٴْنکا انتخاب خالصتاً میرٹ کی بنیاد پر ہوا ہے اور اس پر اٴْنکو فخر ہونا چاہئے۔

(جاری ہے)

انہوں نے کہا کہ انتخابات کا انعقاد ایک مشکل اورپیچیدہ عمل ہے جس کے موثر انعقاد کیلئے آئین ،قانون،رولز،کوڈ آف کنڈکٹ کی جانکاری اور عملی تجربہ ضروری ہے۔

اس تربیتی پروگرام میں آپکو انتخابی قوانین، حلقہ بندیوں، ووٹر رجسٹریشن ،پولنگ کے طریقہ کار ودیگر دفتری امورکی انجام دہی سے متعلق تربیت دی جائے گی اور جہاں تک ممکن ہوگا عملی تجربات ومظاہرہ جات بھی کروائے جائیں گے۔ مزید اس دوران افسران کو جدید ٹیکنالوجی کے استعمال کے متعلق بھی آگاہی فراہم کی جائیگی تاکہ دوران سروس اور عملی زندگی میں ٹیکنا لوجی کو استعمال کرسکیں۔ اختتامی الفاظ میں چیف الیکشن کمشنر نے نئے افسران کو قوم کی خدمت ،آئین وقانون کے مطابق سرکاری امور کی انجام دہی اور عوام کے ساتھ خوش اخلاقی سے پیش آنے کی تلقین کی اور ٹریننگ پر توجہ مذکور کرنے پر زور دیا۔