یونیورسٹی آف انجینئرنگ اینڈ ٹیکنالوجی لاہور میں سالانہ جاب فیئر کا افتتاح ،100سے زائدکمپنیوں نے 180اسٹالز لگائے

بدھ 9 اپریل 2025 22:43

لاہور (اُردو پوائنٹ اخبارتازہ ترین - اے پی پی۔ 09 اپریل2025ء) یونیورسٹی آف انجینئرنگ اینڈ ٹیکنالوجی لاہور میں سالانہ جاب فیئر کا وائس چانسلر ڈاکٹرشاہدمنیر نے افتتاح کر دیا۔میلے میں 100سے زائدکمپنیوں نے حصہ لیا اور180اسٹالز لگائے۔50سے زائد کمپنیوں نے طلبا کی بھرتی کیلئے انٹرویوکئے جبکہ20کمپنیوں نے جاب کیلئے ٹیسٹ بھی لیا۔میلے میں8 ہزار سے زائد طلبا نے شرکت کی۔

اس موقع پر وائس چانسلر ڈاکٹر شاہد منیر نے میڈیا سے گفتگو کرتے ہوئے کہا کہ اس جاب فیئرکا مقصد تعلیمی اور صنعتی شعبوں کو ایک چھت تلے جمع کر کے طلبہ کو روزگار کے مواقع فراہم کرنا ہے۔یو ای ٹی کواپنے گریجوایٹس پر فخر ہے،یو ای ٹی گریجوایٹس ہزاروں کی تعداد میں مختلف فرمز میں کام کر رہے ہیں۔انہوں نے میلے میں شریک کمپنیوں کے ذمہ داران کا شکریہ ادا کیا جن کی وجہ سے سینکڑوں کی تعداد میں فریش گریجوایٹس کو روزگار کے مواقع میسر آئے۔

(جاری ہے)

انہوں نے مزید کہا کہ ٹیکنالوجی کی دنیا میں جدید تقاضوں کو مدنظر رکھتے ہوئے یو ای ٹی جدید علوم پر فوکس کر رہی ہے۔حکومتی ادارے اور دیگر صنعتیں بھی انجینئرز کی کھپت کو پورا کرنے کیلئے یو ای ٹی کی حوصلہ افزائی کر رہے ہیں۔اس سلسلے میں وزیر اعلی ہونہار سکالرشپ پروگرام کا اجرا لائق تحسین ہے، جس سے ہزاروں طلبا مستفید ہو رہے ہیں۔اسی طرح لیپ ٹاپ سکیم کیلئے بھی حکومت پنجاب کے ممنون و مشکور ہیں۔

میلے میں شریک طلبا و طالبات کی دلچسپی قابل قدر تھی۔ڈاکٹر شاہد منیر نے جاب فیئر کے کامیاب انعقاد پر ڈاکٹر نوید رمضان اور ڈاکٹر آصف علی قیصر اور ان کی ٹیم کو سراہا۔ تقریب میں وائس چانسلر سمیت کمپنیوں کے نمائندوں، ڈینز، اساتذہ اور طلبا و طالبات کی کثیر تعدادنے شرکت کی۔ جاب فیئر کے اختتام پرخصوصی تقریب کا انتظام کیا گیاجس میں کمپنیوں کے نمائندگان اور منتظمین کو یادگاری شیلڈ پیش کی گئی۔