وقت آئے گا تو بولیں گے‘ ابھی بولنے کا موسم نہیں، شیخ رشید احمد

آج میں تیسری مرتبہ عدالت آیا ہوں لیکن ابھی تک ہمارا کیس ہی نہیں لگا، سمجھ سے باہر ہے؛ سابق وزیر داخلہ کی میڈیا سے گفتگو

ساجد علی جمعرات 10 اپریل 2025 12:05

وقت آئے گا تو بولیں گے‘ ابھی بولنے کا موسم نہیں، شیخ رشید احمد

اسلام آباد ( اُردو پوائنٹ اخبارتازہ ترین۔ 10 اپریل 2025ء ) عوامی مسلم لیگ کے سربراہ شیخ رشید احمد کا کہنا ہے کہ ابھی بولنے کا موسم نہیں ہے وقت آئے گا تو بولیں گے۔ عدالت میں پیشی کے موقع میڈیا سے مختصر گفتگو میں انہوں نے کہا کہ آج میں تیسری مرتبہ عدالت آیا ہوں لیکن ابھی تک ہمارا کیس ہی نہیں لگا، عدالت میں ایک کسی اور کیس کی سماعت بہت طویل چلی ہے، ہماری سمجھ سے باہر ہے لیکن اب عدالت میں تو وجہ نہیں بتائی جا سکتی، وقت آئے گا تو اس بارے میں بولیں گے، ابھی بولنے کا موسم نہیں ہے۔

شیخ رشید کہتے ہیں کہ ملک میں ہر طرف اندھیرا ہی اندھیرا ہے دعا کریں روشنی ہو جائے، جو لوگ جیل میں ملاقات نہیں کروا سکتے وہ مذاکرات کا نتیجہ کیا نکالیں گے؟ میں نے بڑوں سے اپیل کی تھی کہ غریبوں کو چھوڑ دیں وہ دعا دیں گے لیکن حالات بہتر ہوتے نظر نہیں آرہے کیوں کہ ہر طرف اندھیرا ہے، کوئی سننے والا نہیں ہے، 36 ہزار مقدمات 4 ماہ میں کیسے مکمل ہوں گے؟ ان مقدمات کا 4 ماہ میں پایہ تکمیل تک پہنچنا کافی مشکل ہے۔

(جاری ہے)

سابق وزیر داخلہ یہ بھی کہہ چکے ہیں کہ ملک سیاسی طور پر عدم استحکام کا شکار ہے، مسلم لیگ ن اور پیپلزپارٹی دونوں پارٹیاں نفرت کا نشان ہیں، ہر کوئی ان سے نفرت کرتا ہے، ان دونوں پارٹیوں کی پالیسیوں کی بدولت عوام ان سے نفرت کرتے ہیں، اس وقت ملکی معاشی صورتحال انتہائی خراب ہے، غریب کیلئے دو وقت کی روٹی کمانا مشکل ہوگیا ہے، حالات اتنا خراب ہوتے دیکھ رہا ہوں کہ قومی حکومت وجود میں آسکتی ہے۔

قبل ازیں انسداد دہشتگردی عدالت راولپنڈی میں 9 مئی کے 11 مقدمات کی سماعت ہوئی، جہاں سابق وزیر داخلہ شیخ رشید احمد اور عثمان ڈار عدالت میں پیش ہوئے، اس دوران متعدد ملزمان کے وکلاء بھی عدالت پیش ہوئے، 9 مئی کیسز میں چالان کی نقول ملزمان میں تقسیم کی گئیں، عدالت حاضر ہونے والے ملزمان میں نقول تقسیم ہوئیں، سابق وزیر داخلہ شیخ رشید احمد کو بھی چالان کی نقول فراہم کی گئیں، جس کے بعد 9 مئی کے 11 مقدمات کی سماعت بغیر کارروائی 12 اپریل تک ملتوی کردی گئی۔