20 سال پرانی گاڑی مالکان کیلئے بڑی خبر، حکومت کی نئی وہیکل پالیسی سامنے آگئی

نیوانرجی وہیکل پالیسی کے تحت 20 سال پرانی گاڑیوں کو مرحلہ وار ختم کرنے کا فیصلہ کرلیا گیا

ثنااللہ ناگرہ جمعرات 23 جولائی 2026 21:41

20 سال پرانی گاڑی مالکان کیلئے بڑی خبر، حکومت کی نئی وہیکل پالیسی سامنے ..

لاہور (اردوپوائنٹ اخبار تازہ ترین۔ انٹرنیشنل پریس ایجنسی۔ 22 جولائی 2026ء ) پنجاب حکومت نے نیوانرجی وہیکل پالیسی کے تحت 20 سال پرانی گاڑیوں کو مرحلہ وار ختم کرنے کا فیصلہ کرلیا گیا ہے۔ میڈیا کے مطابق نئی وہیکل پالیسی کا مسودہ تیار کر لیا گیا ہے، مسودے کو منظوری کے لیے جلد صوبائی کابینہ میں بھیجا جائےگا۔ مسودے کے مطابق بیس سال پرانی گاڑیوں پر فوری پابندی عائد نہیں کی جائےگی، بلکہ اس عمل کو مرحلہ وار نافذ کیا جائےگا۔

پہلے مرحلے میں گاڑیوں کی عمر جانچنے کیلئے ڈیجیٹل ویری فکیشن سسٹم قائم کیا جائے گا، گاڑیوں پر پابندیوں کا نفاذ لاہور اور فیصل آباد سمیت منتخب شہروں میں شروع ہوگا۔ گاڑی کی عمر کا تعین اس کی رجسٹریشن کی تاریخ سے کیا جائےگا۔ 2027 تک ڈیجیٹل ویری فکیشن سسٹم پورے پنجاب میں نافذ کرنا حکومت کا ہدف ہے۔

(جاری ہے)

اسی طرح 2031 سے 2035 کے دوران پرانی کمرشل گاڑیوں کو مرحلہ وار سڑکوں سے ہٹا دیا جائے گا۔

حکومت پرانی گاڑی مالکان کو نئی ماحول دوست گاڑیاں خریدنے کیلئے مراعات بھی دے گی۔ دوسری جانب پنجاب حکومت نے نئی گاڑیوں کی خریداری کیلئے ڈیلیوری سے قبل رجسٹریشن لازمی قرار دے دی ہے، اب کوئی بھی نئی گاڑی سرکاری رجسٹریشن کے بغیر شوروم سے باہر نہیں جاسکے گی۔ میڈیا کے مطابق ڈائریکٹرجنرل ایکسائز پنجاب عمر شیر چٹھہ کی ہدایت پر نئی گاڑیوں کی رجسٹریشن سے متعلق نئی پالیسی فوری طور پر نافذ کردی گئی ہے۔

نئی پالیسی کے تحت تمام آٹو موبائل کمپنیوں، مجاز ڈیلرشپس اور موٹر برانچ حکام کو پابند کیا گیا ہے کہ نئی گاڑی کی رجسٹریشن خریدار کو ڈیلیوری سے پہلے مکمل کی جائے۔ حکام کے مطابق کہ پنجاب کے کمپیوٹرائزڈ قومی شناختی کارڈ رکھنے والے خریداروں کو اب مکمل رجسٹرڈ گاڑی، سرکاری نمبر پلیٹ اور تمام قانونی دستاویزات کے ساتھ فراہم کی جائے گی، جس سے انہیں بعد میں ایکسائز دفاتر جانے کی ضرورت نہیں رہے گی۔اس مقصد کے لیے مجاز ڈیلرشپس کو ڈیلر وہیکل رجسٹریشن سسٹم کے تحت رجسٹریشن کا اختیار دیا جائے گا، گاڑیاں بنانے والی کمپنیوں کو اپنی تمام مجاز ڈیلرشپس کی فہرست ایکسائز ڈیپارٹمنٹ کو فراہم کرنے کی ہدایت کی گئی ہے، جس کے بعد انہیں ڈی وی آر ایس لائسنس جاری کیے جائیں گے۔