Live Updates

حکومت نے یومیہ بنیادوں پر آج پھر عوام پر پیٹرول بم گرا دیا

پیٹرول 4 روپے 40 پیسے جبکہ ڈیزل کی قیمت میں 3 روپے 62 پیسے فی لیٹر اضافہ کردیا گیا، نوٹیفکیشن جاری

ثنااللہ ناگرہ جمعرات 23 جولائی 2026 23:11

حکومت نے یومیہ بنیادوں پر آج پھر عوام پر پیٹرول بم گرا دیا

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی۔ 23 جولائی 2026ء ) وفاقی حکومت نے پیٹرولیم مصنوعات کی قیمتوں میں ردوبدل کا اعلان کردیا ہے۔ پیٹرولیم ڈویژن کے جاری کردہ نوٹیفکیشن کے مطابق پیٹرول کی قیمت میں 4 روپے 40 پیسے فی لیٹر اضافہ کردیا ہے۔ پیٹرول کی نئی قیمت 331 روپے 52 پیسے فی لیٹر مقرر کردی گئی ہے۔ جبکہ ڈیزل کی قیمت فی لیٹر قیمت میں 3 روپے 62 پیسے اضافہ کر دیا گیا ہے، ڈیزل کی نئی قیمت 378 روپے 66 پیسے فی لیٹر مقرر کردی گئی۔

نئی قیمتوں کا اطلاق آج رات 12 کے بعد ایک دن کیلئے ہوگا۔ یاد رہے وفاقی کابینہ نے پیٹرولیم مصنوعات کے لیے روزانہ قیمتوں کے تعین کا نیا نظام منظور کر لیا جس کے تحت اوگرا اب پیٹرول اور ڈیزل کی ایکس ڈپو قیمتیں روزانہ جاری کرے گا۔

(جاری ہے)

پیٹرول اور ڈیزل کی نئی قیمتیں گزشتہ سات کاروباری دن کی اوسط عالمی قیمت کے مطابق ہوں گی، پیٹرول اور ڈیزل کی قیمتوں کا تعین عالمی مارکیٹ کے حساب سے کیا جائے گا۔

قیمتوں کے اعلان کے لیے وزیراعظم یا وفاقی حکومت کی پیشگی منظوری درکار نہیں ہوگی جبکہ اوگرا بغیر وزیراعظم یا حکومت کی منظوری کے قیمتوں کا اعلان کرے گا۔ دوسری جانب ملک میں پٹرولیم مصنوعات کی قیمتوں میں حالیہ اضافے پر ردعمل دیتے ہوئے ماہر معیشت ڈاکٹر فرخ سلیم نے اہم انکشاف کیا ہے۔ انہوں نے بتایا کہ حالیہ ہفتے کے دوران پاکستان نے خطےمیں ڈیزل کی قیمت میں سب سے زیادہ اضافہ کیا۔

صرف ایک ہفتے کے دوران پاکستان میں ڈیزل کی قیمت میں 16 فیصد سے زائد اضافہ کیا گیا۔ جبکہ اس دوران افغانستان کے علاوہ بھارت سمیت خطے کے بیشتر ممالک میں ڈیزل کی قیمت میں کوئی اضافہ نہیں کیا گیا۔ جبکہ پاکستان میں ڈیزل کی قیمت افغانستان سے بھی زیادہ ہونے کا انکشاف ہوا ہے۔ ڈاکٹر فرخ سلیم کے مطابق افغانستان میں ڈیزل کی فی لیٹر قیمت پاکستانی روپے میں 74 روپے ہے۔ جبکہ پاکستان میں ڈیزل کی فی لیٹر قیمت 375 روپے ہے۔