محصولات پر کشیدگی، امریکا چین تجارت میں 80 فیصد کمی کا امکان ہے، ڈبلیو ٹی او

عالمی معیشت کو دو حصوں میں تقسیم کرنے سے عالمی جی ڈی پی میں 7 فیصد طویل مدتی کمی ہوسکتی ہے،بیان

جمعرات 10 اپریل 2025 14:02

جنیوا(اُردو پوائنٹ اخبارتازہ ترین - این این آئی۔ 10 اپریل2025ء)تجارتی محصولات پر امریکا اور چین کے درمیان کشیدگی کے حوالے سے عالمی تجارتی تنظیم نے امریکا۔چین تجارت میں 80 فیصد کمی کا امکان ظاہر کر دیا۔غیرملکی خبر ایجنسی کے مطابق محصولات پر تنا سے امریکا اور چین کے درمیان تجارت 80 فیصد تک کم ہوسکتی ہے۔ ورلڈ ٹریڈ آرگنائزیشن کے مطابق دنیا کی دو بڑی معیشتوں کے درمیان محصولات کی مقابلے بازی عالمی معشیت کو سخت نقصان پہنچا سکتی ہے۔

(جاری ہے)

ڈبلیو ٹی او کا کہنا تھا کہ امریکا اور چین کا عالمی تجارت میں حصہ 3 فیصد تک ہے۔ ورلڈ ٹریڈ آرگنائزیشن کے مطابق عالمی معیشت کو دو حصوں میں تقسیم کرنے سے عالمی جی ڈی پی میں 7 فیصد طویل مدتی کمی ہوسکتی ہے۔امریکا اور چین کے درمیان تجارتی جنگ شدت اختیار کرگئی ہے، اسی دوران صدر ڈونلڈ ٹرمپ نے محصولات میں 90 دن وقفے کا اعلان کردیا، تاہم چین پر 125 فیصد ٹیرف فوری طور پر نافذ العمل کردیا گیا۔امریکی میڈیا کا کہنا تھا کہ امریکی صدر ٹرمپ نے جوابی ٹیرف نہ لگانے والے ممالک پر اضافی ٹیرف 90 روز کیلیے معطل کردیا۔