کراچی سمیت مختلف شہروں میں مشتعل افراد کا غیرملکی فوڈ چین شاپس پر دھاوا، پتھراؤ کرکے شیشے توڑ دیئے

کراچی ( اُردو پوائنٹ اخبارتازہ ترین۔ 10 اپریل 2025ء ) صوبہ سندھ کے دارالحکومت کراچی سمیت مختلف شہروں میں مشتعل افراد نے غیرملکی فوڈ چین شاپس پر دھاوا بول دیا۔ اے آر وائی نیوز کے مطابق کراچی سمیت تین شہروں میں غیر ملکی فوڈ چین کے آؤٹ لیٹس پر حملے ہوئے جہاں مشتعل افراد نے پتھراؤ کرتے ہوئے شیشے توڑ دیئے، شہر قائد کے علاقہ گڈاپ میں غیر ملکی فوڈ چین شاپ پر مشتعل افراد نے حملہ کیا، تاہم پولیس کی بھاری نفری نے مشتعل افراد پر لاٹھی چارج کرکے مظاہرین کو منتشر کر دیا۔

ایس ایس پی ملیر کے ترجمان نے بتایا کہ متعدد افراد فوڈ شاپ پراحتجاج کے لیے آئے، پولیس سٹیشن ساتھ ہی ہونے کے باعث اہلکار بروقت پہنچے اور بروقت کارروائی کرکے 9 افراد کو حراست میں لے لیا، جس کے نتیجے میں گڈاپ میں غیرملکی فوڈ چین فرنچائز پر شرپسندوں کے حملے کی کوشش کو ناکام بنا دیا گیا، اس سلسلے میں ایس ایس پی ملیر کاشف آفتاب کی زیر نگرانی آپریشن کیا گیا اور مشتعل افراد کی سپر ہائی وے روڈ بلاک کرنے کی کوشش بھی ناکام بنادی گئی۔

(جاری ہے)

بتایا گیا ہے کہ کراچی کے پوش علاقے ڈیفنس خیابان اتحاد میں واقع غیرملکی فوڈ چین پر مشتعل افراد نے حملہ کیا جہاں درجنوں مشتعل افراد نے غیرملکی فوڈ چین کے ریسٹورنٹ پر پتھراؤ کیا اور نعرے بازی کی، اس دوران مشتعل افراد نے فوڈ شاپ کے باہر گاڑیوں کو بھی نقصان پہنچایا، ایس ایس پی ساؤتھ نے بتایا کہ مشتعل افراد نے فوڈشاپ میں توڑ پھوڑ کی اور گیٹ کا شیشہ توڑ دیا، اطلاع ملنے پر پولیس موقع پر پہنچی اور توڑ پھوڑ میں ملوث متعدد افراد کو حراست میں لے لیا، ایک شخص کو ہتھوڑے سمیت حراست میں لیا گیا اور پولیس کی اضافی نفری تعینات کر دی گئی۔

معلوم ہوا ہے کہ لاڑکانہ میں بھی لاٹھی بردار مظاہرین نے نجی فوڈ چین فرنچائز پر اچانک پتھراؤ کرتے ہوئے شیشے توڑ دیئے، مظاہرین کے پتھراؤ کے بعد فوڈ چین فرنچائز کی جانب سے کاروباری سرگرمیاں معطل کردی گئیں، علاقہ ایس ایس پی نے کہا کہ ملک میں چند مقامات پر بیرون ملک کی فوڈ چین فرنچائز کو نشانہ بنانے کے واقعات سامنے آئے ہیں، ہمیں اندازہ تھا جس بنا پر پولیس فوری ریسپانس کے لیے پہلے ہی سے تیار تھی۔ اسی طرح صوبہ پنجاب کے دارالحکومت لاہور کے علاقہ ڈیفنس فیز سکس میں بھی مشتعل ہجوم کی جانب سے غیر ملکی ریسٹورنٹ پر حملے کی اطلاعات سامنے آئیں۔