جو عزت نہ دے، اس کی زندگی میں جگہ نہیں،اداکارہ رمشا خان

میری والدہ نے ہی مجھے اداکاری کی دنیا میں قدم رکھنے پر آمادہ کیا اور یہ فیصلہ میرے کیریئر کا ایک اہم موڑ ثابت ہوا

جمعہ 11 اپریل 2025 10:35

کراچی (اُردو پوائنٹ اخبارتازہ ترین - این این آئی۔ 11 اپریل2025ء)پاکستانی ڈرامہ انڈسٹری کی باصلاحیت اور مقبول اداکارہ رمشا خان نے کہا ہے کہ جو عزت نہ دے، اس کی زندگی میں جگہ نہیں۔رمشا خان نے حال ہی میں ایک پوڈکاسٹ میں اپنی ذاتی اور پیشہ ورانہ زندگی کے بارے میں کھل کر گفتگو کی ہے۔انہوں نے اپنی اداکاری کے سفر، ذاتی اصولوں اور زندگی کے تجربات پر روشنی ڈالی۔

اداکارہ نے انکشاف کیا کہ میں بچپن سے ایک انٹروورٹ(کم گو اور تنہائی پسند)شخصیت رکھتی ہوں اور اگر میری والدہ مجھے نہ ابھارتیں، تو شاید آج بھی اپنے کمرے میں بیٹھ کر ویڈیو گیمز کھیل رہی ہوتی۔انہوں نے بتایا کہ میری والدہ نے ہی مجھے اداکاری کی دنیا میں قدم رکھنے پر آمادہ کیا اور یہ فیصلہ میرے کیریئر کا ایک اہم موڑ ثابت ہوا۔

(جاری ہے)

انٹرویو کے دوران رمشا خان نے تعلقات اور دوستی سے متعلق اپنے واضح اصولوں کا ذکر کرتے ہوئے کہا کہ میں لوگوں کو دوسری بار موقع ضرور دیتی ہوں، خاص طور پر اگر ان سے کوئی غلطی ہو جائے، لیکن اگر کوئی شخص میری بے عزتی کرے، تو اسے اپنی زندگی سے مکمل طور پر نکال دیتی ہوں۔

ان کا کہنا ہے کہ میں لوگوں کو غلطیوں پر معاف کر دیتی ہوں، لیکن بے عزتی میرے لیے ناقابلِ برداشت ہے، جھوٹ بولنا اور دھوکا دینا بھی اسی زمرے میں آتا ہے، ایسے لوگوں کے لیے میری زندگی میں کوئی جگہ نہیں۔یاد رہے کہ رمشا نے اپنے کیریئر کا آغاز فلم تھوڑا جی لے سے کیا تھا، جس میں ان کے ساتھ بلال عباس خان نے بھی ڈیبیو کیا تھا، اس کے بعد انہوں نے پیچھے مڑ کر نہیں دیکھا اور دنیا پور اور جنت سے آگے جیسے ڈراموں میں اپنی شاندار اداکاری سے ناظرین کے دل جیت لیے۔