پاکستان اور جاپان کا تجارت، سرمایہ کاری و دیگر شعبوں میں تعاون بڑھانے پر اتفاق

وزیراعلیٰ پنجاب مریم نواز اور جاپان کے وزارت خارجہ کے سینئر اسٹیٹ منسٹر مایا جی ٹاکوما کی ٹوکیو میں جاپانی دفتر خارجہ میں ملاقات ہوئی جہاں دوطرفہ تعلقات کو مزید وسعت دینے کے عزم کا اعادہ کیا گیا

ساجد علی بدھ 20 اگست 2025 13:44

پاکستان اور جاپان کا تجارت، سرمایہ کاری و دیگر شعبوں میں تعاون بڑھانے ..

ٹوکیو/لاہور ( اُردو پوائنٹ اخبارتازہ ترین۔ 20 اگست 2025ء ) پاکستان اور جاپان نے تجارت، سرمایہ کاری و دیگر شعبوں میں دوطرفہ تعاون بڑھانے پر اتفاق کرلیا۔ تفصیلات کے مطابق وزیراعلیٰ پنجاب مریم نواز اور جاپان کے وزارت خارجہ کے سینئر اسٹیٹ منسٹر مایا جی ٹاکوما کی ٹوکیو میں جاپانی دفتر خارجہ میں ملاقات ہوئی جہاں وزیراعلیٰ مریم نواز نے جاپان کی قیادت اور عوام کے لیے نیک خواہشات کا اظہار کرتے ہوئے کہا کہ جاپان ایک ایسا ملک ہے جو معاشی، ٹیکنالوجیکل اور معاشرتی ترقی کا گہوارہ ہے اور اس کی انسانی قدروں کے ساتھ جڑی ہوئی ترقی دنیا بھر کے لیے قابل تقلید ہے، پنجاب میں جاپان کے ترقیاتی ماڈل کو نافذ کرنا چاہتے ہیں تاکہ عوام کو جدید سہولتیں فراہم کی جا سکیں۔

بتایا گیا ہے کہ ملاقات میں قدرتی آفات کے حوالے سے بھی بات چیت ہوئی، مایا جی ٹاکوما نے پاکستان میں سیلاب سے ہونے والے جانی نقصان پر افسوس اور ہمدردی کا اظہار کیا جب کہ مایا جی ٹاکوما نے وزیراعلیٰ مریم نواز کو خوش آمدید کہا اور انہیں پنجاب کی پہلی خاتون وزیر اعلیٰ بننے پر مبارکباد پیش کی، انہوں نے کہا کہ اس سطح کی پاکستانی شخصیت کا جاپان کا دورہ خوش آئند ہے، پنجاب میں 120 سے زائد منصوبوں کا آغاز قابل تعریف ہے، جاپان پاکستان کو ہمیشہ ایک قریبی دوست ملک کے طور پر دیکھتا ہے۔

(جاری ہے)

معلوم ہوا ہے کہ وزیراعلیٰ مریم نواز نے سرمایہ کاروں کے لیے اپنی حکومت کی مراعاتی پالیسی سے جاپانی قیادت کو آگاہ کیا اور کہا کہ ’پاکستان جاپان کے تجربات سے استفادہ کرے گا تاکہ زلزلوں اور سیلاب جیسی آفات سے بہتر طور پر نمٹا جا سکے، جاپان کی تعمیراتی ٹیکنالوجی اور قدرتی آفات سے نمٹنے کا ماڈل پاکستان کے لیے بے حد مددگار ثابت ہوگا، مشکل وقت میں جاپان کی حمایت اور تعاون کو پاکستان کبھی فراموش نہیں کرے گا‘، جب کہ ملاقات کے اختتام پر مایا جی ٹاکوما نے مریم نواز اور ان کے وفد کی آمد پر شکریہ ادا کیا اور دونوں ممالک کے درمیان دوستانہ تعلقات کو مزید وسعت دینے کے عزم کا اعادہ کیا۔