سرینگر جموں شاہراہ پر حفاظتی اقدامات مزید سخت

ریلوے لائن کے افتتاح سے قبل ضلع ریاستی میں سخت سیکورٹی انتظامات

ہفتہ 12 اپریل 2025 13:40

سرینگر(اُردو پوائنٹ اخبارتازہ ترین - این این آئی۔ 12 اپریل2025ء)بھارت کے غیر قانونی زیر قبضہ جموں و کشمیر میں انتظامیہ نے سری نگر جموں شاہراہ پر حفاظتی اقدامات مزید سخت کردئیے جس سے شہریوںکی مشکلات میں اضافہ ہو گیا ہے۔کشمیر میڈیا سروس کے مطابق انتظامیہ نے کٹھوعہ اور ادھمپور اضلاع میں شاہراہ کے اہم مقامات پر بھارتی فوج، سینٹر ریزرو پولیس فورس (سی آر پی ایف) اور پولیس کے اضافی اہلکار تعینات کردئیے ہیں۔

(جاری ہے)

شاہراہ پر مزید چوکیاں قائم کی گئی ہیں ۔ بھارتی فورسز اہلکار گاڑیوں ،مسافروں اور راہگیروںکی سخت تلاشی لے رہے ہیں۔فورسز اہلکار سراغ رساں کتوں کا بھی استعمال کر رہے ہیں۔ جموں سے وادی کشمیر کی طرف جانے والی گاڑیوں کی انتہائی باریک بینی سے تلاشی لی جا رہی ہے۔دریں اثنا ادھمور سرینگر ریلویے لائن کے افتتاح سے قبل جموںخطے کے ضلع ریاسی میں بھی حفاظتی اقدامات انتہائی سخت کر دیے گئے ہیں۔ بھارتی ذرائع ابلاغ کے مطابق وزیر اعظم نریندر مودی 19اپریل کو ریلوے لائن کا افتتاح کریں گے۔