Live Updates

پی ایس ایل 10 کا تیسرا ٹاکرا، کراچی کنگز نے ملتان سلطانز کو شکست دے دی

جیمز ونس کی دھواں دار سینچری کی بدولت کراچی کنگز نے 234 رنز کا ہدف آخری اوور میں حاصل کر لیا

محمد علی ہفتہ 12 اپریل 2025 23:46

کراچی (اردو پوائنٹ تازہ ترین اخبار ۔ 12 اپریل 2025ء ) پی ایس ایل 10 کا تیسرا ٹاکرا، کراچی کنگز نے ملتان سلطانز کو شکست دے دی، جیمز ونس کی دھواں دار سینچری کی بدولت کراچی کنگز نے 234 رنز کا ہدف آخری اوور میں حاصل کر لیا۔ پاکستان سپر لیگ (پی ایس ایل) 10 میں کراچی کنگز نے ملتان سلطانز کو جیت کے لیے 235 رنز کا ہدف دیا۔ نیشنل اسٹیڈیم کراچی میں کھیلے گئے ایونٹ کے تیسرے میچ میں کپتان ڈیوڈ وارنر نے ٹاس جیت کر ملتان سلطانز کو پہلے بیٹنگ کی دعوت دی۔

ملتان سلطانز کی جانب سے کپتان محمد رضوان اور شے ہوپ نے اننگز کا آغاز کیا، شے ہوپ صرف 8 رنز بنانے کے بعد حسن علی کا شکار بنے جب کہ عثمان خان بھی 19 رنز بنانے کے بعد اپنی وکٹ گنوا بیٹھے۔ کپتان محمد رضوان105 رنز بنا کر ناقابلِ شکست پویلین لوٹے، مائیکل بریسویل 44 رنز بنا کر ناٹ آؤٹ رہے، کامران غلام 36 رنز بنا کر آؤٹ ہوئے۔

(جاری ہے)

کراچی کنگز کی جانب سے خوشدل شاہ ، حسن علی اور عباس آفریدی نے 1، 1 وکٹ حاصل کی۔

کراچی کنگز کے اسکواڈ میں ڈیوڈ وارنر (کپتان)، جیمز ونس، شان مسعود، ٹِم سائفرٹ (وکٹ کیپر)، عرفان خان، خوشدل شاہ، ایڈم ملنے، عرفات منہاس، حسن علی، فواد علی، عباس آفریدی شامل تھے۔ ملتان سلطانز کی ٹیم محمد رضوان (کپتان، وکٹ کیپر)، شائی ہوپ، عثمان خان، افتخار احمد، کامران غلام، مائیکل بریسویل، شاہد عزیز، ڈیوڈ ولی، کرس جورڈن، اسامہ میر، عاکف جاوید پر مشتمل تھی۔