کمشنر نصیرآباد ڈویژن کا ضلع صحبت پور میں جاری ترقیاتی منصوبوں کا دورہ

اتوار 13 اپریل 2025 20:40

کوئٹہ (اُردو پوائنٹ اخبارتازہ ترین - اے پی پی۔ 13 اپریل2025ء) کمشنر نصیرآباد ڈویژن معین الرحمان ننے چھٹی کے روز ضلع صحبت پور میں جاری ترقیاتی منصوبوں کا دورہ کیا،انہوں نے مفاد عامہ کے تحت شروع کئے گئے 35 مختلف ترقیاتی منصوبوں کا تفصیلی معائنہ کیا۔ دورے کے دوران انہوں نے بی ایچ یوز، سکولز اور دیگر تعمیراتی منصوبوں کا جائزہ لیا۔

(جاری ہے)

اس موقع پر سپرنٹنڈنٹ انجنیئر بلڈنگز ارسلا خان رند و، ایکسین صحبت پور عرفان علی نے جاری ترقیاتی منصوبوں سے متعلق تفصیل کے ساتھ کمشنر کو آگاہی فراہم کی جبکہ دیگر متعلقہ افسران بھی موجود تھے۔

کمشنر معین الرحمٰن خان نے سختی سے ہدایت کی کہ مفاد عامہ میں جاری ترقیاتی منصوبوں کے معیار پر کسی قسم کا سمجھوتہ ہرگز برداشت نہیں کیا جائے گا۔ انہوں نے متعلقہ افسران کو منصوبہ جات کی بروقت اور معیاری تکمیل یقینی بنانے کی ہدایت کرتے ہوئے کہا کہ حکومت بلوچستان نے ضلع صحبت پور میں عوام کی فلاح و بہبود اور ان کی ضروریات کو مدنظر رکھ کر ترقیاتی عمل شروع کیا ہے اس لئے ضروری ہے کہ متعلقہ آفیسران ان منصوبہ جات کے معیار کو یقینی بنانے کیلئے اپنی کاوشیں بروئے کار لائیں ۔