وزیراعلیٰ سندھ کی اپنے والد سید عبداللہ شاہ کی برسی پر ان کے مزار پر حاضری

سیہون (اُردو پوائنٹ اخبارتازہ ترین - این این آئی۔ 14 اپریل2025ء)وزیراعلی سندھ سید مراد علی شاہ اپنے والد سابق وزیراعلی عبداللہ شاہ کی 18 ویں برسی کی تقریب میں شرکت کیلئے واہڑ پہنچے جہاں انہوں نے اپنے والد مرحوم سید عبداللہ شاہ کی مزار پر حاضری دی اور فاتحہ خوانی کرکے ان کی مغفرت کیلئے دعا کی بعد ازاں میڈیا سے گفتگو کرتے ہوئے سید مراد علی شاہ نے کہا کہ آج یہاں اپنے والد مرحوم سید عبداللہ شاہ کی 18 ویں برسی میں شرکت کیلئے آیا ہوں، ان کی مغفرت کیلئے دعا کی ہے اور اپنے لیے بھی دعا کی ہے کہ ان کے نقش قدم پر چلتے ہوئے عوام کی بے لوث خدمت کروں، انہوں نے کہا کہ آج برسی کے حوالے سے کوئی جلسہ منعقد نہیں کیا گیا ہے بلکہ صرف قران خوانی کا اہتمام کیا گیا ہے ۔

انہوں نے کہا کہ چیئرمین پاکستان پیپلز پارٹی بلاول بھٹو زرداری نے 18 اپریل کو حیدرآباد میں جلسے کا اعلان کیا ہے جس میں عوام بھرپور طریقے سے شرکت کریں گے ایک سوال پر انہوں نے کہا کہ مجھے پتہ نہیں کہ اعظم سواتی کو کس نے مذاکرات کا مینڈیٹ دیا ہے تاہم ہم چاہتے ہیں کہ پی ٹی آئی والے اپنی طرز سیاست کو چھوڑ کر مثبت سیاست کریں اور ملک و قوم کے مفاد کے مد نظر سنجیدگی کا مظاہرہ کریں۔

(جاری ہے)

ایک سوال پر انہوں نے کہا کینالز کسی صورت نہیں بننے دیں گے ہمارا کیس مضبوط ہے اور ہمارے موقف کو کوئی مسترد بھی نہیں کر سکتا جبکہ بلاول بھٹو نے بھی یہ واضح طور پر کہا ہے کہ اگر ایسا کچھ ہوا تو وہ عوام کے ساتھ ہوں گے وفاق کے ساتھ نہیں ہوںگے ایک سوال پر انہوں نے کہا کہ سیہون شہر سمیت امن و امان کی صورتحال کو مزید بہتر بنائیں گی.۔اس موقع پر چیف سیکرٹری سندہ سید آصف حیدر شاہ، سابق ایم این اے سکندر راہپوٹو، سیکریٹری پبلک ہیلتھ انجنیئرنگ سندہ سید اعجاز علی شاہ، محمد سلیم باجاری، امان اللہ شاھانی، سردار حاکم خان نوحانی، مخدوم ضمیر، سید آصف علی شاھ، ڈویژنل ڈائریکٹر اطلاعات حیدرآباد شھزاد شیخ، ڈپٹی کمشنر جامشورو غضنفر علی قادری، ڈپٹی کمشنر سید علی مرتضی شاھ ایس ایس پی جامشورو محمد ظفر صدیق چھانگا اور دیگر متعلقہ افسران بھی ان کے ہمراھ تھے۔