خیبرپختونخوا پولیس کو ایک سال میں 30ارب سے زائد کا سامان فراہم کیا گیا

علی امین گنڈا پور نے امن وامان کے قیام کیلئے پولیس کو متعدد وسائل فراہم کیے ہیں، ترجمان

منگل 15 اپریل 2025 21:40

پشاور (اُردو پوائنٹ اخبارتازہ ترین - این این آئی۔ 15 اپریل2025ء)ترجمان وزیراعلی خیبرپختونخوا نے بتایا ہے کہ پختونخوا پولیس کو ایک سال میں 30ارب روپے سے زائد کا سامان فراہم کیا گیا ہے۔ محکمہ پولیس کے لیے صوبائی حکومت کی جانب سے کیے گئے اقدامات پر ترجمان وزیراعلی خیبر پختونخوا فراز احمد مغل نے کہا کہ وزیر اعلی علی امین گنڈا پور نے امن وامان کے قیام کے لیے پولیس کو متعدد وسائل فراہم کیے ہیں۔

انہوں نے بتایا کہ گزشتہ ایک سال میں پولیس کو30ارب روپے سے زائد مالیت کا سامان فراہم کیا گیا، جس میں 4ہزار ایس ایم جیز کی فراہمی بھی شامل ہے۔ علاوہ ازیں پشاور سیف سٹی پروجیکٹ کا دائرہ کار ٹانک،میران شاہ،لکی مروت اور ڈیرہ اسماعیل خان تک پھیلا یا گیا ہے۔ سیف سٹی پروجیکٹ پر 2ارب سے زائد کی رقم خرچ کی گئی ہے۔

(جاری ہے)

انہوں نے کہا کہ خیبرپختونخو ا پولیس میں 3797نئی بھرتیاں کی گئی ہیں، جن میں ضم اضلا ع سے 2423بھرتیاں شامل ہیں۔

ضم اضلا ع کے 1196اہلکاروں کو ایلیٹ پولیس فورس کی تربیت دی گئی۔ ضم اضلاع میں 321 ملین کی لاگت سے 105 گاڑیوں کو بلٹ پروف کیا گیا۔ترجمان کے مطابق پولیس شہدا میں 36کروڑروپے نقد جبکہ 100کروڑ کے 501 پلاٹس تقسیم کیے گئے۔ جیلوں میں قیدیوں کو بہتر خوراک فراہم کرنے کے لیے 2ارب روپے خرچ کیے گئے۔ اسی طرح قیدیوں کو ہنر سکھا کر ان کی تیار کردہ مصنوعات سے 11ملین روپے حاصل ہوئے۔ انہوں نے بتایا کہ قیدیوں کے کمائے گئے پیسے گھر بھیجنے کیلئے 210بینک اکاونٹس بھی کھلوائے گئے۔