Live Updates

قانون سازی تک ویپ کاروبار کرنے والوں کیخلاف کاروائی نہ کرنے کا حکم

لاہور ہائیکورٹ نے ویپ اور الیکٹرک سگریٹ پر پابندی کے خلاف دائر درخواستیں نمٹا دیں

جمعرات 3 جولائی 2025 15:13

قانون سازی تک ویپ کاروبار کرنے والوں کیخلاف کاروائی نہ کرنے کا حکم

لاہور (اُردو پوائنٹ اخبارتازہ ترین - این این آئی۔ 03 جولائی2025ء) لاہور ہائیکورٹ نے ویپ اور الیکٹرک سگریٹ پر پابندی کے خلاف دائر درخواستیں نمٹا دیں ،عدالت نے متعلقہ اداروں کو قانون سازی تک ویپ کاروبار کرنے والوں کے خلاف کاروائی نہ کرنے کا حکم دے دیا۔جسٹس انوار حسین نے ویپ مال سمیت ایک سو سے زائد ڈیلرز کی درخواستوں پر سماعت کی جن میں چیف سیکرٹری ، ہوم سیکرٹری اور سی سی پی او کو فریق بنایا گیا ۔

جسٹس انوارِ حسین نے درخواست گزار وکلا سے مکالمہ کرتے ہوئے کہا کہ کیا پراپرٹی ڈی سیل ہوگئی ہے، وکلاء نے جواب دیا ڈی سیل ہوگئی ہے لیکن پولیس ابھی تک دوکانداروں کو حراساں کررہی ہے ۔ اسٹنٹ ایڈوکیٹ جنرل عمران خان نے عدالت کو بتایا کہ کابینہ اجلاس میں ویپ کے استعمال کے مضر اثرات اور اس کو کنٹرول کرنے کے متعلق تبادلہ خیال ہوا، ویپ سے وابستہ کاروبار کو ریگولیٹ کرنے کے لئے قانون سازی کی جارہی ہے، ویپ کاروبار کو ریگولیٹ کرنے لیے مسودہ بنایا ، سٹیک ہولڈرز کا موقف بھی سنا جائے گا ۔

(جاری ہے)

جسٹس انوار حسین نے پنجاب حکومت کے لاء افسر سے مکالمہ کرتے ہوئے کہا کہ کابینہ میں معاملہ ڈسکس ہوا اور آئی جی نے کہا فٹا، فٹ چھاپے مارنا شروع کردیں، معاشرے کو ایک سرا چائیے ، مدعی چشت گواہ ،مدعی سست والا معاملہ ہے، فریم ورک ضرور بنائیے ، پہلے بھی کہا تھا کہ آئین کر کسی کو کاروبار کا حق دیتا ہے۔ اسسٹنٹ ایڈوکیٹ جنرل نے جواب دیا کہ انتظامیہ نے ویپ کاروبار کرنے والوں کے خلاف کوئی کریک ڈائون نہیں کیا ، ویپ کاروبار سے وابستہ دوکانوں کے خلاف کوئی کاروائی نہیں کی گئی ۔

جسٹس انوارِ حسین نے اسٹنٹ ایڈوکیٹ جنرل سے مکالمہ کرتے ہوئے کہا کہ درخواست گزار کسٹم ڈیوٹی ادا کرتے ہیں ، قانون سازی تک ان کے کاروبار کیسے بند کئے جاسکتے ہیں ،جب تک قانون سازی نہیں ہوگی ، کوئی بھی درخواست گزاروں کے خلاف کاروائی نہیں کرے گا ۔