پائیدار مستقبل پر نوجوانوں کی رائے جاننے کے لیے یو این فورم شروع

اسلام آباد (اُردو پوائنٹ ۔ UN اردو۔ 16 اپریل 2025ء) دنیا بھر کے نوجوان اس ہفتے اقوام متحدہ کے ہیڈکوارٹر میں جمع ہو کر دنیا کو منصفانہ، ماحول دوست اور مزید پائیدار جگہ میں تبدیل کرنے کے لیے تجاویز پیش کریں گے۔

اقوام متحدہ کی معاشی و سماجی کونسل (ایکوسوک) کے یوتھ فورم کی صورت میں ہونے والے اس اجتماع میں دنیا کی ترقی کے لیے پائیدار تبدیلی اور سماجی شمولیت پر توجہ مرکوز کی جائے گی۔

فورم کے افتتاحی اجلاس سے خطاب کرتے ہوئے اقوام متحدہ کی جنرل اسمبلی کے صدر فائلیمن یانگ نے کہا ہے کہ نوجوانوں کو بااختیار بنانا ایک ایسی سرمایہ کاری ہے جس سے پورے معاشرے اور اس کے تشکیل کردہ مستقبل کو پائیدار فوائد حاصل ہوتے ہیں۔

(جاری ہے)

ایکوسوک کے صدر باب رے نے اجلاس سے خطاب کرتے ہوئے کہا کہ تمام لوگوں کے لیے مزید مستحکم، مشمولہ اور منصفانہ مستقبل تشکیل دینے کی ہنگامی ضرورت جس قدر واضح اب ہے پہلے کبھی نہ تھی۔ نوجوان مستقبل کے رہنما ہیں اور انہیں کل کا انتظار کرنے کے بجائے آج ہی اپنا کردار شروع کرنا ہو گا۔

نوجوانوں کا قائدانہ کردار

امسال 'نوجوانوں کا قائدانہ کردار: پائیدار ترقی کے لیے سائنس اور سماجی شمولیت' اس فورم کا بنیادی موضوع ہے۔

جرمنی سے فورم میں شریک ہونے والے ایک نوجوان نے یو این نیوز کو بتایا کہ ایسے لوگوں کو نمائندگی ملنا بہت اہم ہے جنہیں اہم موضوعات پر بات کرنے کا موقع نہیں مل پاتا۔

سماجی شمولیت

دنیا کو بہت سے پیچیدہ بحرانوں کا سامنا ہے اور ایسے حالات میں نوجوانوں کا کردار بہت اہمیت اختیار کر گیا ہے۔ تبدیلی لانے والوں کی حیثیت سے یہ نوجوان سماجی انصاف، پائیدار ترقی اور عالمگیر سلامتی کے لیے اپنا کردار ادا کر رہے ہیں۔

کینیڈا سے آنے والے نوجوان ریان لی نے یو این نیوز سے بات کرتے ہوئے کہا کہ فورم میں اس بات پر زور دیا گیا ہے کہ پائیدار ترقی کے لیے سماجی شمولیت بہت اہم ہے۔

پائیدار ترقی کی قوت

نوجوان تازہ اور دلیرانہ تصورات پیش کرتے ہیں اور دنیا کی بہتری کے لیے ان کا بہت اہم اور منفرد کردار ہے۔ وہ پائیدار ترقی کی قوت ہیں اور مقامی، قومی و عالمی سطح پر اختراع و ترقی کا پہیہ آگے بڑھاتے ہیں۔

فورم میں شریک نوجوان شمانے ربانی نے یو این نیوز کو بتایا کہ نوجوان تبدیلی کا حصہ بننا چاہتے ہیں اور وہ قومی و عالمی پالیسیوں کی تشکیل میں اپنا کردار ادا کرنے کے خواہاں ہیں۔ ایسی بات چیت میں نوجوانوں کی فعال شمولیت بہت ضروری ہے جو آنے والی نسلوں کے پائیدار، مساوی اور مشمولہ مستقبل کی بنیاد بنتی ہے۔

اس فورم کا انعقاد ایکوسوک کے صدر نے کیا ہے اور اس کے انتظام میں اقوام متحدہ کے متعدد ادارے شامل ہیں۔

فورم جمعرات تک جاری رہے گا جس میں مختلف موضوعات پر آٹھ اجلاس ہوں گے۔ اس دوران پائیدار ترقی کے لیے 2030 کے ایجنڈے اور اس کے 17 اہداف (ایس ڈی جی) کے حصول کی کوششوں پر بات چیت ہو گی۔