پیغام پاکستان کے تحت ضلعی انتظامیہ کا علمائے کرام سے مل کر امن پیغام کو ضلع کے کونہ کونہ تک پہنچانے کا فیصلہ

جمعرات 17 اپریل 2025 14:53

فیصل آباد (اُردو پوائنٹ اخبارتازہ ترین - اے پی پی۔ 17 اپریل2025ء) پیغام پاکستان کے تحت ضلعی انتظامیہ فیصل آباد نے علمائے کرام سے مل کر امن پیغام کو ضلع کے کونہ کونہ تک پہنچانے کا فیصلہ کیا ہے۔اس ضمن میں ڈپٹی کمشنرفیصل آبادکیپٹن (ر)ندیم ناصر کی زیرصدارت پیغام پاکستان کی آگاہی بارے اہم اجلاس منعقد ہواجس میں جمعہ کے خطبات میں پیغام امن کو اجاگر کرنے کےساتھ ساتھ علمائے کرام کے ہمراہ عوامی آگاہی کیلئے ریلی بھی نکالنے کا فیصلہ کیاگیا۔

ڈپٹی کمشنر نے سکولوں،کالجوں اور یونیورسٹیز میں طالب علموں کو پیغام پاکستان کا بیانیہ بتانے کیلئے سیمینارز کرانے کی تلقین کی اورکہا کہ نمایاں جگہوں پر بینرز آویزاں کرائے جائیں۔انہوں نے کہا کہ پیغام پاکستان امن کا پیغام ہے اوراس کی روشنی میں فکر اور رویوں کی اصلاح کیلئے عملی اقدامات ناگزیر ہیں۔

(جاری ہے)

انہوں نے کہا کہ آنے والی نسلوں کو پرامن پاکستان دینا ہماری ذمہ داری ہے جبکہ انسانیت سے محبت ہی امن کا راستہ ہے۔

کیپٹن (ر)ندیم ناصر نے کہا کہ ملک پاکستان کسی طرح بھی دہشتگردی کا متحمل نہیں ہوسکتا۔انہوں نے عزم کا اظہار کیا کہ دہشتگردی کے ناسور کاجڑسے خاتمہ کرنے کیلئے ہر ممکن اقدامات کئے جائیں گے۔انہوں نے کہا کہ قانون نافذ کرنے والے اداروں کے ہاتھ مضبوط کرنے کی اشد ضرورت ہے۔اجلاس میں شریک علمائے کرام نے امن کے پیغام کو عام کرنے کے عزم کو دہرایااور کہا کہ کسی شرپسند کو امن میں خلل نہیں ڈالنے دیں گے۔

انہوں نے کہا کہ قانون نافذ کرنے والے اداروں کی دہشتگردی کے خلاف جنگ میں دی جانے والی قربانیوں کو رائیگاں نہیں جانے دیں گے اورپیغام پاکستان کیلئے علمائے کرام ضلعی انتظامیہ کے شانہ بشانہ ہیں۔اس موقع پر مختلف محکموں کے افسران اور علمائے کرام بھی اجلاس میں شریک تھے۔اجلاس کے دوران سی پی او فیصل آباد بلال عمر کے والد محترم کی وفات پر فاتحہ خوانی بھی کی گئی۔