وزیراعلیٰ کی الحمرا میں پنجاب دیہاڑکی تقریب میں شرکت،روایتی پرتپاک استقبال
مریم نوازنے استاد اللہ بخش گیلری میں پنجاب کے حسین نظاروں پر مشتمل آرٹ نمائش کا افتتاح بھی کیا، لاہور کی ثقافت کی شاندار عکاسی
وزیراعلیٰ مریم نواز کا چوڑیوں، کھگو گھوڑے، کھسے، بلاک پرنٹ،مکیش اور گوٹا کناری ملبوسات میں اظہارِ دلچسپی،دستکاری،پنجابی پگڑی، شملے، گنڈاسا، کھنڈا، آرٹ نمونوں کا معائنہ،گندھارااورہڑپہ آرٹ مجسمے، ایمبرائیڈری آرٹ،سولر پینٹنگ،پینسل مائیکرو آرٹ اور چاول کے دانے پر خطاطی دیکھی
وزیراعلیٰ مریم نواز نے دستکاری سٹال پر ننھی وردا اور دیگر فنکاروں کے ساتھ تصاویر بنوائیں،چھپرچھت والے روایتی گھروں،فرنیچر، مٹی کے برتن وغیرہ دیکھ کر اظہار مسرت،تقریب میں فنکاروں کے درمیان بیٹھ گئیں
جمعرات 17 اپریل 2025
20:20
لاہور (اُردو پوائنٹ اخبارتازہ ترین - این این آئی۔ 17 اپریل2025ء)شالا وسدا روے پنجاب صوبہ کی تاریخ میں پہلی مرتبہ پنجاب دیہاڑ کی تین روزہ رنگا رنگ تقریبات کاالحمرا میں آغاز ہوگیا۔وزیراعلیٰ مریم نوازشریف نے محکمہ اطلاعات وثقافت کے زیر اہتمام پنجاب دیہاڑ کی تقریب میں خصوصی طورپر شرکت کی۔ وزیراعلیٰ مریم نوازشریف کے الحمرا آرٹس کونسل پہنچنے پر روایتی انداز میں پرتپاک استقبال کیاگیا۔
الحمرا آرٹس کونسل کے احاطے میں ڈھول کی دھمک، رنگیلے گھوڑے، اونٹوں کا مست رقص اور فوک موسیقی بھی پیش کی گئی۔وزیراعلیٰ مریم نوازشریف نے استاد اللہ بخش گیلری میں پنجاب کے حسین نظاروں پر مشتمل آرٹ نمائش کا افتتاح بھی کیا۔ذوالفقار زلفی کی بنائی پینٹنگ میں لاہور کی ثقافت کی شاندار عکاسی کی گئی۔
(جاری ہے)
وزیراعلیٰ مریم نواز شریف نے پینٹنگ کو سراہا۔
وزیر اطلاعات وثقافت عظمی زاہد بخاری نے خطاب میں تفصیلی بریفنگ دی اور وزیراعلیٰ مریم نواز شریف کی آمد کا خیر مقدم کیاگیا۔وزیر اعلی مریم نواشریف نے برنی گارڈن میں انوکھے اور منفردپنڈ کاتفصیلی دورہ کیا۔وزیراعلیٰ مریم نواز شریف نے چوڑیوں، کھگو گھوڑے، کھسے، بلاک پرنٹ،مکیش اور گوٹا کناری ملبوسات میں گہری دلچسپی کا اظہار کیا۔دستکاری،پنجابی پگڑی، شملے،گنڈاسا، کھنڈا،ہڑپہ اور ٹیکسلا آرٹ نمونوں کے سٹال کا معائنہ کیا۔
وزیراعلیٰ مریم نواز شریف نے گندھارا آرٹ مجسمے، ایمبرائیڈری آرٹ،سولر پینٹنگ پینسل مائیکرو آرٹ اور چاول کے دانے پر خطاطی دیکھی۔ کھجور کے رنگ برنگ پتوں سے بنی چھابی، پچھی، چنگیر،پلیٹ، پکھے کی بناوٹ کا مشاہدہ کیا۔ وزیراعلیٰ مریم نواز نے چاک پر مٹی کی برتن، کھڈی پر کپڑے کی بنت، اونٹ کی کھال کی لیمپ دیکھے اور پسند کئے۔ وزیراعلیٰ مریم نواز شریف نے روایتی پنجابی مونڈھے،منجیاں، لکڑی کے چولہے، چوبارہ اور دیگر اشیا میں اظہارِ دلچسپی لی۔
وزیراعلیٰ مریم نواز شریف نے دستکاری سٹال پر ننھی وردا اور دیگر فنکاروں کی خواہش پر تصاویر بنوائیں۔وزیراعلیٰ مریم نوازشریف نے روایتی دیہاتی ماحول دیکھ کر اظہار مسرت، منفرد آئیڈیاکو سراہا۔ وزیراعلیٰ مریم نوازشریف نیپنڈمیں چھپرچھت والے روایتی گھروں،فرنیچر، مٹی کے برتن اور دیگرروزمرہ استعمال کی روایتی اشیا دیکھ کر اظہار مسرت کیا۔
وزیراعلیٰ مریم نوازشریف پنجاب ثقافت دیہاڑ کی تقریب میں حامد رانا،سہیل اصغر، راشد محمود،عارف لوہار،ریشم اور دیگر سینئرفنکاروں کے درمیان بیٹھ گئیں۔ تقریب میں انسٹرومنٹل ٹیون پر قومی ترانے پیش کیا۔غیر ملکی سفارتکاروں،صوبائی وزرا، معاونین، افسران اور دیگر شرکا نے پگڑیاں پہن کر شرکت کی۔ تقریب میں پیلے اور سرخ پنجابی لاچے کرتے میں ملبوس ڈھولچیوں نے فن کا مظاہرہ کیا۔
رنگا رنگ روایتی ملبوسات پہنے فنکاروں نے گیدا پیش کیا اور روایتی جوش وخروش سے للکارے۔پنجاب ثقافت دیہاڑ کی تقریب میں روایتی بھنگڑا،ماہیے اور ٹپے بھی پیش کیے گے۔معروف گلوکار ہ حنا نصراللہ نے منفرد انداز میں پنجابی صوفی کلام پیش کیا،دیگر فنکاروں کی پرفارمنس دیکھی۔ صوبائی وزیر ثقافت و اطلاعات عظمی زاہد بخاری نے پنجاب دیہاڑ کی تقریب سے خطاب کرتے ہوئے کہا کہ75 سال کی تاریخ میں پہلی مرتبہ بڑے پیمانے پر پنجاب دیہاڑ منایا جا رہا ہے ۔
پنجاب کی ثقافت اتنی وسیع و عریض ہے کہ اسے لفظوں اور سٹالز میں سے شو کیس کرنا ممکن نہیں ۔پنجاب دیہاڑ کی تقریب میں ہر ڈویڑن کا روایتی ثقافتی سٹال لگایا گیا ہے۔انہوں نے کہا کہ پنجاب کا کلچر اب یتیم نہیں رہا، مریم نواز شریف نے کلچر کو اصل روح سے بحال کیا۔وزیر اعلی مریم نواز شریف فنکاروں کی سرپرستی کر رہی ہیں ۔ترکیہ وزٹ پر وزیر اعلی مریم نواز شریف عالمی توجہ کا مرکز بنی رہی ۔پنجاب کا ہر شہر اپنی منفرد پہچان رکھتا ہے۔محمد نواز شریف اور مریم نواز شریف فنکاروں سے ڈائریکٹ رابطے میں رہتے ہیں ۔فنکاروں کے لئے پیکچ اور مراعات لائیں گے۔ تقریب میں دیگر فنکاروں نے بھی شرکت کی۔
